Lars-Emil: Isumaqatiginninniarsinnaatitaaneq Nunatta tigusariaqarpaa

Folketingimi aasaanerani sulinngiffeqanngilaataa naggataarutaasumik oqallinnermi, Nunarput sinnerlugu folketingimi ilaasortat Lars-Emil Johansen Sofia Rossenilu ippassaq oqalugiarput.

- Pissusissamisuussaarmi Namminersorlutik Oqartussat aallartitaat nunarput sinnerlugu isumaqatiginninniartassappata. Lars-Emil Johansen oqarpoq.

Tassani pineqarpoq nunanut allanut ministerip Lene Espersenip

Canadami issittormiut ataatsimiinerannut peqataannginnera. Danmarkilu kaammattorpaa issittumi pissutsinut politikkikkut isumaginninneq Kalaallit nunaannut suliarisassanngorteqqullugu.

Ilanngullugu USA-p Pituffimmik atuinerminut pilliuteqarneq ajornera pakatsissutigaa.

- Kalaallit Nunaannut iluaqutaanngilaq, siunnersuutimininnguit, pingaarutilinnut telefon normut kiisaalu Sermersuarmut paasisassarsiorluni angalanermut aningaasaliinerit eqqaassanngikkaanni. Tamanna naamanngilluinnarpoq, Lars-Emil Johansen oqarpoq.

Nunatsinni uuliamik gassimillu siunissami qalluisoqalerpat USA-p upalungaarsimanissamut suleqataanermigut Pituffimmik atuinerminut pilliuteqarneq ajornini matussusertariaqaraa, Lars-Emil Johansenip neriuutigaa.

- Mexicop kangerliumanersuani ulluni makkunani uuliamik maqisoornersuup Amerikamiunut nuanneeqisumik misilittagaqaataalernera, siunissami tamatsinnut ilinniutaasinnaavoq, Lars-Emil Johansen ilaatigut oqarpoq.

Sofia Rossen-ip IA-meersup, ullumikkut Naalakkersuisut nunatta aningaasaqarneranik patajaallisaaniarnerminnut politikkiat paasissutissiissutigaa.

Isumaginninnikkullu suliniutit sumut killinnerat saqqummiullugu.

Tusagassiuutillu tupinnartussarsiortut allaaserisagaat, ilaatigut Kalaallit Nunaata Norgemut Canadamulluunniit tuneqqullugu Danmarkimut siunnersuutaasartut, tikkuartorpai.

- Kalaallit Nunaat aningaasanik nalilerneqarsinnaanngilaq. Uagut Danmarkilu naligiimmik ataatsimoorussaqarnerput upperaarput, Sofia Rossen Folketingimi aasaanerani sulinngiffeqanngilaataa naggataarutaasumik oqallinnermi ippassaq oqarpoq.