Lars-Emil Inatsisartuni akissarsiaqqortunerpaasoq
Qaammatillu tamaasa soraarnerussutisiat parlamentinit marlunniit isertittarpai, kiisalu maanna atuuffimminiit aamma akissarsiaqarluni.
AAMMA ATUARUK Inatsisartut ima akissarsiaqarput
KNR-ip allagaatit pissarsiarisai naapertorlugit, Inatsisartunut siulittaasoq maanna suliaminut tunngatillugu akissarsisarpoq, Inatsiartunilu ilaasortaasimanerminit soraarnerussutisiaqarluni.
Taakkulu saniatigut Folketingimiit aamma soraarnerussutisiaqarpoq. Taakkulu tamarmik malittarisassat unioqqutinnagit atuupput.
Kielsenimit akissarsiaqarnerusoq
Lars-Emili qaammatit tamaasa Inatsisartuni Siulitaasutut inissisimanermini 53.252 koruunisisarpoq. Taakkulu saniatigut ukiumut 120.000 koruuninik tapisiassarsisarluni. Tassalu ukiumut isertittagai 760.000 koruuniusarlutik.
Inatsisartuni ukiuni 14-ini ilaasortaasimanerminut qaammatit tamaasa soraarnersiutitut 15.343 koruunisisarpoq. Tassalu ukiumut soraarnersiutit 184.116 koruuniusarlutik.
Folketingimi ilaasortaasimanerminut tunngatillugu Lars-Emili aammattaaq soraarnersiutisisarpoq, tassanilu marloriarluni ilaasortaasarsimalluni, 1973-imiit 1979-mut kiisalu 2001-imiit 2011-mut.
Folketingip nittartagaa naapertorlugu, ukiut 16-it ilaasortaasimagaanni soraarnersiutit qaammammut 25.398 koruuniusarput, imaluunniit ukiumut 304.776 koruunit.
Isertitat katikkaanni ukiumut, akileraarutit suli peernagit, 1.248.856 koruuniullutik.
Assersuutigalugu Kim Kielsen Naalakkersuisut Siulittaasuattut ukiumut 760.00. koruusisisarpoq, taannami soraarnersiutisisannginnami.
Ineqarneq akilerneqartartoq.
Akissarsiat soraarnersiutillu saniatigut, Lars-Emili Inatsisartuni Siulittaasutut suliffimminut tunngatillugu inissaqartitaavoq. Qinngutsinni illumi najugaqarpoq, taannalu illu Namminersorlutik Oqartussat 2012-imi pisiarivaat 5,3 million korunnilerlugu.
Illumi najugaqarnerminut akiliisanngilaq, taammattorli illu akileraarutinut ukiumut 48.000 korunuunut nalilerneqarsimavoq, taakkulu Siulittaasup akileraarutitut akilertarpai.
Taassuma saniatigut Namminersorlutik Oqartussat illup asserfallatsaalineranut ingerlatsinermullu akiliisarput.
Paasitinneqarsinnaatitaaneq KNR-p pissarsiarisimasaata takutippaa Namminersorlutik Oqartussat 2015-imi 2016-imilu 762.057 koruuninik taakkununnga aningaasartuuteqarsimasut.
AAMMA ATUARUK Lars-Emilip igaataa errugassaq nunatta karsianut millionip sisamararterutaanik naleqartoq
Lars-Emili isumaqanngilaq marlunnik soraarnersiutisarami ajornartorsiutaasoq, naak suli Nunanitsinni politikkikkut suligaluarluni.
-71-inik ukioqarpunga, atorfigisimasannilu soraarnersiutissaqaruma, inatsisitigut ajornartorsiutitaqanngilaq soraarnersiutit tigusassagukkit. KNR-imullu oqaatigivaa nammineq isummani naapertorlugu pissusissamisoortoq pisussaaffigalugulu, assersuutigalugu Folketingimi ilaasortaasimanermut tunngatillugu tigusassallugit.
AAMMA ATUARUK Inatsisartut ima akissarsiaqarput
Marloqiusamik akissarsiaqarneq oqallisaasoq
Siornatigut Danmarkimi oqaallisaasimavoq, politikerit suli sulisut, ministeriusimanermut tunngatillgu soraarnersiutisisarsimammata, suliffigisamiit imaluunniit politikkikkut atorfimminniit akissarsiuutigalutik. Taamaasiortut ilagaat Venstremeersoq Bertel Haarder aammalu Bendt Bendtsen Kornservativimeersoq, taamatut BT 2015-imi allassimavoq.
Illuatungaatigulli politikerit danskit allat soraarnersiutinut qujaannarsimapput suli suligallarnerminni. Taakkununnga ilaavoq Venstemi siulittaasuusimasoq Henning Christophersen. Taanna 1985-imi EU-kommissærinngorami, ministeriusimanermut tunngatillugu soraarnersiutissaraluni qujaannarfigisimavai, EU-miit ukiuni qulini akissarsisarnermi nalaani.
Allaaserisami paasissutissat Namminersorlutik Oqartussani sulisoqarnermut, inatsisilerinermullu immikkoortortaqarfianiit, Folketingimiit, paasitinneqarsinnaatitaanermiit, BT-mi allaaserisamiit kiisalu Lars-Emilip nammineerluni Inatsisartunut paasissutissiineraniit.