Lars Emil: Frank Hansenip atorfinitsinneqarnera akuuffiginngilluinnarpara

Tusagassiorfitsigut piffissami kingullermi Aningaasaqarnermut Naalakkersuisoqarfimmi pisortatut Carsten Frank Hansenip (CFH) atorfinitsinneqarnerani assigiinngitsutigut akuusimanerarneqartarpunga.

Ilaatigut Berlingskemi oqaatigineqarsimavoq CFH ”ilaquttama qanittumik ikinngutigigaat”, taamatullu aamma ”uanga nammineq atorfimmut inassutigisimagiga.” Taamaassorinninnerit taakku erseqqissumik ilumuunnginnerassavakka, Lars Emil Johansen allappoq.

Taamaalilluni erseqqissarneqassaaq CFH sunnguamilluunniit ilaquttama uangaluunniit ikinngutima qaninnerit ilaginngimmassuk. Massakkut allaffigisanni ataasiarluta kaffisoqatigiinnikuuvugut – CFH-p nammineq kissaateqarneratigut. Taamaalilluni CFH-mik atorfinitsitsineq sunnguamilluunniit uannit ikinngummik ikiuiniarnertut taaneqarsinnaanngilluinnarpoq, tassami suliamut oqallisigineqartumut sunnguamilluunniit attuumassuteqarsimannginnama.

Eqqortussaq pillugu ilanngullugu ilisimatitsissutigisinnaavara CFH-p atorfinitsinneqannginnerani Ramsdalimit oqarasuaatikkut attaveqarfigineqarama. Ramsdalimut ilisimatitsissutigaara CFH nalinginnaasumik ajunngitsumik misigisaqarfigisimagakku, taamatullu aamma isumaqarlunga periarfissaqarnerugaluartoq pisortani allaffissornikkut atorfeqarani inuussutissarsiornermi suliffeqarfimmi sulippat. Taamaalillunga pineqartoq pillugu arlaannik uparuaatissaqarsimanngilanga, kisiannili nammineq allaffissornikkut atorfimmut qaffasissumut inassutigisinnaanagu, ilisimasattut pisortani allaffissornikkut sulinermik misilittagaqanngim-mat. Tamatuma tusagassiorfinnit uanga nammineq CFH-mik tapersersuisimanerarlunga aallaaserisat taamaalillutik tusagassiorfiit namminneq akisussaaffigisariaqarpaat, Lars Emil Johansen naggasiivoq.