Lars-Emil: Aalajangiisoqarli
Inatsisartut siulittaasuata Lars-Emil Johansenip Inatsisartut ataatsimiittarfissaata inissisimaffissaatut piumanerusaa taasisut amerlanerussuteqarlutik akerleralugu taasipput. Lars-Emil Johansenillu neriuutigaa kommunalbestyrelsip inissisimaffissaq sumiissanersoq aalajangiukkumaaraa piffissami qaninnerpaami.
Allattoq Sara K. Jakobsen
Inatsisartut siulittaasoqarfiata kommunalbestyrelsip aalajangiinissaa suli utaqqivaa. Aalajangertoqarnissaalu piaarnerpaamik pisariaqartoq, Lars-Emil oqarpoq.
- Maannakkut Kommuneqarfik Sermersuup illuliorfissaqqissumik akuerisinnaasatsinnik namminerlu akuerisinnaasaminik saqqummiussaqarnissaa utaqqisariaqassavarput, Lars-Emil Johansen oqarpoq.
- Neriuppunga taanna isummerfigisinnaajumaaraat, annertunerusumik kinguarsaaqqinnatik.
AAMMA ATUARUK Taasitsinerup kingorna partiit eqqartueqqikkusulerput
Borgmester Asii Chemnitz-Narup tusagassiorfinnut nalunaarummi allappoq Aqqaluup Aneerasaartarfia periarfissatut isigiunnaarlugu. Lars-Emilillu tupiginngilaa taasisut amerlanerussuteqartut inissisimaffissaq akerlerinngimmassuk.
- Isumaqarpunga tupaallannarpallaanngitsoq oqallissimaneq eqqarsaatigigaanni. Taasititsineq kommunalbestyrelsip nalilertussaavaa kingornalu qanoq iliussanerluni aalajangertussaallugu, Lars-Emil Johansen oqarpoq.