Lars Chemnitz toquvoq
Inatsisartuni siulittaasuusimasoq Lars Chemnitz sivisuumik napparsimareerluni 81-nik ukioqarluni ullaaq manna toquvoq,
”Ikinngutiga suleqatigalu – inatsisiliortoq imaannaanngitsoq, naalakkersuinikkut siuttoq maligassiuisorlu peeruppoq.
Inatsisartut Siulittaasorisimasaat Lars Chemnitz ukiuni 30-ni naalakkersuinikkut maligassiuisuulluni nunaminik sullissisimavoq. Kalaallit Nunaanni Inatsisartuni suleqatigisimasai sinnerlugit qimagaasunut angisuumik misiginneqataagatta oqaatigiumavara. Tamatumalu peqatigisaanik Lars Chemnitzip Kalaallillu Nunaannut sullissisimaneranut akuersaarnerput ataqqinninnerpullu oqaatigiumavara. Eqqaaneqarnera ataqqinartuuli”, ilaatigut taama eqqaaniummini allappoq maannakkut inatsisartuni siulittaasuusoq Jonathan Motzfeldt.
Lars Chemnitz misilittagarpassuaqarpoq ilinniartitsisutullu ilinniagaqartuuvoq.
Jonathan Motzfeldtilu allakkamini ima nangippoq:
”Kalaallit Nunaat pillugu Lars Chemnitzip sulinera siusinnerusukkut maannalu naalakkersuinermik sulialinnut maligassaasimavoq, soorluttaaq 1995-imi naalakkersuinikkut sulinerminit tunuarnermi kingorna Kalaallit Nunaanni sumiluunniit ataqqineqartuarsimasoq.”
Jonathan Motzfeldt taama ilaatigut allappoq.
Lars Chemnitz Atassummi 1979-imiit 84 tikillugu nuna tamakkerlugu siulittaasuuvoq. 1980-kkullu qeqqata missaani nunanut allanut ministeeriaqarfimmi kalaallinut siunnersortitut atorfeqarsimavoq, taamatuttaaq allarpassuarni siulersuisuni ilaasortaaffeqarsimallunittaaq.
