"The Laramie Project" Thorshavnimi isiginnaartitsissusiarineqassaaq

Savalimmiuni suiaassuseqatiminnik atoqateqartartut pisinnaatitaaffii pillugit oqallinnerujussuaq isumassarsiffigalugu isiginnaartitsissusiortoqarsimavoq, taannalu Thorshavnimi sapaatip akunnerani uani takuteqqaarneqassaaq.

Isiginnaartitsisartut Teater Skifte-mik taaguutillit isiginnaagassiaq ”The Laramie Project” sapaatiuppat Savalimmiuni takuteqqaassavaat.

Isiginnaartitsissusiaq Amerikameersuuvoq, tassanilu oqaluttuarineqarpoq 21-nik ukiulik Matthew Shepard inuusuttoqatiminit marlunnit 1998-imi nikanarsarneqarlunilu naalliutsinneqartoq ungallunullu qilersoriarlugu qimanneqartoq. Anniartitaanermi kingunerinik kingusinnerusukkut toquvoq.

Sammisaq Savalimmiuni saqqumilaartinneqaqaaq, tassa Savalimmiuni Inatsisartut ukiormanna siusinnerusukkut sivisuumik oqalliserujussuarnerup kingornagut pineqaatissiisarnermut inatsimmi suiassuseqatiminnik atoqateqartartut pisinnaatitaaffii ilanngummatigik.

Isiginnaartitsisussat tassaapput Savalimmiormiut isiginnaartitsisartut tallimat, ilitsersuisoralugu Solveig Weinkouff danskiusoq aamma svenskimik isiginnaartitsisarfimmik aaqqissuisoqarput.