Landis pissassaatitorsimammat Team Phonak-imit anisitaavoq
Cykelerluni sukkaniuttarnerit nunarsuarmi sakkortunersaattut taaneqartartumi, Tour de France-imi, ukioq manna ajugaasoq, Floyd Landis, unammisarnernit anisitaalerunavippoq.
Landisip pissassaatinik inerteqqutaasunik atuisimasinnaanera misissorniarlugu b-prøvemik taaneqartartup inernera, ullaap tungaa saqqummiunneqarmat, paasinarsivoq Landis ilumut inerteqqutaasunik pissassaatitorsimasoq.
Paasisat tunngavigalugit Floyd Landis Team Phonak-imit erniinnaartumik soraarsitaavoq.
Apeqqutaalerporlu Tour de France-imi ajugaasimanini aamma annaassaneraa.
Landisi maanna suna tamaat atorlugu annanniarsarivoq, nittartakkamini nalunaarutigaa nunarsuarmi cykelerlutik sukkaniuttartut kattuffiata, UCI-p naammagittaalliornermut malittarisassai atorlugit pinngitsuunini uppernarsarniarlugu.
