Labradorimi tuttut ikiliartupiloortut

Ukiut 20-t matuma siornatigut tuttut Labradorimi 800.000-it missaannik amerlassuseqarput.

Maannakkut 74.000-it missaannik amerlassuseqarnissaat ilimagineqarpoq, tassalu 10 procentinik ikileriarsimallutik.

Tuttut qassinik amerlassuseqarnerat qulakkeerlugu oqaatigineqarsinnaanngikkaluartoq ikileriarujussuarsimanerat tamarmik isumaqatigiillutik oqaatigaat.

Ikileriarsimanerannut pissutaatinneqartut ilaatigut, tassaapput tuttut nerisaqarfiini sanaatortoqarnera kiisalu uumasut nappaataannik nappaateqarneq aammalu amaqqut tuttut nerisarfiiniittalersimanerat.

Tuttut naggueqatigiit inuit inuussutissarsiutaasa pingaarnersaarat, taamaattumillu ikiliartupiloornerannut patsisaasup paasineqarnissaa massakkut pingaaruteqartoq, Nunatsiavumi avatangiisinut ministeri Darryl Shiwak oqarpoq.

Indianerit Innut Labradorimiittut tuttutassatik ukiumut pisassiissutigineqartut affaanngortippat.

Avatangiisinut ministerip Shiwakip Nunatsiavummilu naalakkersuisuit aqutsisuisa naggueqatigiit Inuit Labradorimi nunaqarfinni illoqarfinnilu najugaqartut oqaloqatiginiarpaat, tuttut ikiliartupiloornerat qanoq iliorluni pinngitsoorneqarsinnaanersoq pilllugu.

Ukiut 100-t matuma siornatigut tuttut ullumikkutut ikiliartupiloorput, taamanikkut avatangiisinit pisunit pissuteqarlutik ikiliartunngillat, kingornalu amerliartoqqillutik.

Labradorimi tuttut ikiliatupiloornerat sulilu ikileriarnerunissaat ernummatigineqarpoq, allaat nungutaanissaat aarleqqutigineqarluni.