Labourip nuannarineqarnera appariarpoq
Partii qeqqani inissisimasoq, Liberaldemokraterne, tassanilu siulittaasoq Nick Clegg nuannarineqarnerujartortoq, isumasiuinerup takutippaa.
Tuluit Nunaannilu partiit isumasiuinerni imminnut ima qanitsigaat, Tuluit Nunaata aatsaavissuaq partiinik arlalinnik naalakkersuisoqatigeeqalernissaa ilimanartorujussuanngorluni.
Manna tikillugu Nick Cleggip naalakkersuisoqateqalissaguni kikkut suleqatigilissanerlugit eqqarsaatigilluarpaa, kisiannili Brownip Cameronillu Liberaldemokratit tapersuinissaat pisariaqartippaat, taamaattumillu kikkut tamarmik tusarnaarluaqqissaarput Nick Clegg ippassaq ima oqarmat:
- Ilumoorsinnaanngilaq partii ataasiinnaq nr. 3-nngussappat qinersisiminillu millionilikkaanit alarneqarsimasoq naalakkersuisunik pilersitsissagaluarpat, Clegg taama oqarpoq oqaatsini toqqaannartumik Gordon Brownimut Labourimullu tunngatillugit, tassalu Cameronimik Konservativiusumik qularnanngitsumik suleqateqarnissani piumanerullugu nalunaaruteqarnera siulleq.
Nick Cleggip Gordon Brownillu imminnut iluarisimaarnerat pitsaanerpaajunngitsoq naluneqanngikkaluarpoq, taamaattorli manna tikillugu Konservativit Liberaliusunik qinersinissaannut annilaangasaarpaat, oqaatigalugulu Clegg qinerunikku taava Gordon Brown pissarsiarissagaat, taannali tassa taama oqaqqissinnaajunnaarluni.
Akerlianilli Labour maanna oqarpoq Liberaldemokratinik qinersisoqarpat qinersineq Konservativinik qinersinerussasoq. Nick Cleggilli annertuunik allanngortitsinissat piumasariniarpai, taakkua Danmarkimi pissutsinut assingunerusunngortinniarlugit, tamannali Cameronip tusarumanngilluinnarlugu.
Qinersisarnermik allanngortitsinissaq naalakkersuisut, tassaanngitsoq qinersisartut, aalajangernerannik naggateqassaaq, suullu tamarmik partiit apeqqutaatinnagit torsuusani isumaqatigiissutigineqartalissallutik, tamannalu pissusissamisuunngilaq, Konservativit pisortaat oqarpoq.
Labourilli sapinngisannguani tamaat Liberaldemokratinut nuliarsartup qinerseriaasissaq nutaaq ammaffiginerullugu:
Suleqatima ilaat assiginagit nutaamik qinerseriaaseqalernissaq isumakuluutiginngilara, isumaqarpunga qinersinissap matuma kingorna qanoq qinersisalissanersugut eqqarsaatigilluassagaanni silatusaarnerussasoq, nunami namminermi pissutsinut ministeri Alan Johnson oqarpoq.
Tuluit Nunaanni qinersinissamut ullut quliinnanngorput, tassalu maajip arfernganni.
