Laajaatitsisarneq atorluarneqarsinnaavoq

Kalaallit Danmarkimi inuiaqatigiinnut akuunerulersinniarlugit Århusimi suliniuteqarneq illoqarfinni aqutsisut allat ilinniutigisinnaagaat, Århusimi kalaallit laajaasarnerinut aqutsisuat Karl Fleischer oqaluttuarpoq. Laajaasussat ullaakkut piffissaq eqqorlugu itersinnaanngitsut aasarpai suliartuullugillu. Namminerlu pissarsiaqarfigilluarpaa:

-Uanga ajunngitsorujussuarmik pissarsiaqarfigivara. Uanga atorfeqarpunga kommunimi chauffør-itut laajaasullu aasarpakka. Aamma sulisitsisutut atuuppunga. Taava busseqarpugut neriartoriarlutalu, taquassalioriarluta suliartorfissarput ornittarparput. Taava marluk pingasullu qeqqata missaanni naammassigaangatta aamma busserluta angerlartarpugut, Karl Fleischer oqarpoq.

Århusimi kalaallit laajaasut aqqaneq marluk 15-illu missaanniitttut akornanni formand-iusoq. Laajaasut ullaakkut katersuuteriarlutik suliffeqarfinni assigiinngitsuni iluarsaassisarput imaluunniit naasorissaasuni naasupiluujaasarlutik. Annertussusileriikkamik ikiorsiissutit pisartakkamik qaavatigut laajaasut sulinertik tiimimut 12 kroni halvtreds-imik akissarsissutigisarpaat.

Aningaasatigut iluaqutigilaarnerata saniatigut aamma laajaasut iminnginnerulerput:

-Sualummik tamakku imersimasartut imernaveersaartarput, qasusalerlutik, angerlarlutillu sinittalerlutik aqagussamullu qilanaarlutik. Taamaalillutik ulloq sukkanerusumik atortarpaat. Taava aamma timikkut tarnikkullu assut malunnartumik nakussakkiartorlutik, Karl Fleischer oqarpoq.

Isumaqarpoq aamma suliniut Danmarkimi kommunini anginerni allani kalaallinik atugarliortoqarfiusuni ilaarneqarsinnaalluartoq. Pisariaqartippaali kalaallisut oqaluttumik formandeqarnissaat, laajaasut paasineqarnerunissaat pillugu ullaakkullu aaneqartarnissaat aamma pisariaqartarmat.