Alaatsinaattoq: Løkkep paarlaaqatigiinnikkut talerperliit amerlanerussuteqarnerulersippai
Aleqa Hammondip Folketingip Kalaallit Nunaannut tunngasunut ataatsimiititaliaani siulittaasunngortinneratigut ministeriuneq Lars Løkke Rasmussen (V) torrallaangaatsiarpoq.
Politikerip nunatsinneersup assortuussutaasullu Venstremeersoq Marcus Knuth taarserlugu siulittaasussatut sisamanngormat toqqarneqarnerata kingorna politikkikkut alaatsinaattoq Hans Engell taama naliliivoq.
- Løkke taamaaliornermigut torrallaavoq. Naalakkersuisut maannakkorpiaq 90-inik tunuliaqutaqalerput, Hans Engell taama oqarpoq.
- Danskit naalakkersuisuisa uppitinneqannginnissaannut Aleqa Hammondip qularnaveeqqutigineratigut danskit naalakkersuisui qajannaannerusumik inissisimalerput.
Hammondip Venstrellu isumaqatigiissutaanni danskit ministeriuneqartarnerannut apeqqutinik pilertoqassagaluarpat naalakkersuisuinik uppititsinnginnissaminik Hammond neriorsuuteqarpoq.
Danskit ministeriuneqartarnerannut apeqqut tassaavoq danskit naalakkersuisuisa ikinnerussuteqalissagunik tunuarnissaminnik imaluunniit qinersisoqarnissaanik suaaruteqarnissaminnik nalunaaruteqareerlutik Folketingimi siunnersuummik taasissutigisassatut saqqummiussinerat.
- Ukiuni aggersuni partiinut allanut nuuttoqarsinnaanissaa partiit talerperliit akornanni ernumassutigineqarpoq. Politikerimmi talerperliit partiimut allamut nooratarsinnaanerannik Christiansborgimi tusatsiakkat arlaqarput.
- Taamaammat Løkke amerlanerussuteqaqqalaaginnarpoq. Hammondillu paarlaaqatigineratigut ilaasortaq ataaseq qulakkeerpaa, ministeriuneruninilu annaassaguniuk ajutoorujussuartariaqassaaq.
Hammond Folketingip kreditkortianik atuisimanini pillugu Siumumit aggustip qaammaatani ilaasortaajunnaarsinneqarpoq. Hammond politikkimik suliaqarnermini aningaasanik piginngisaminik atuisimasutut siornatigut aamma paasisaasimavoq.
Naalakkersuisut siulittaasuattut apriilimi 2013-imi ivertinneqarpoq. Pisortalli aningaasaataannik 100.000 koruunit sinnerlugit atuisimanera paasineqarmat naalakkersuisut sulittaasuattut 2014-imi septembarip qaammataani tunuartariaqalerpoq.
/ritzau/
