Assi: Enhedslisten

Løkkep Nuuliarnera Enhedslistenip SF-illu isumaqatigiinngissutigigaat

Ministeriunerup mittarfiit pillugit neqeroorutaa Nuummullu tikeraarnera Enhedslistenip nunatsinnut tunngasunut oqaaseqartartuata Christian Juhlip isornartorsiorpaa. Tamannalu SF-imit paasiuminaatsinneqarpoq.

Allaaserisaq Christian Juhlip KNR-imut oqaatigisaanik Enhedslistenillu Danmarkip mittarfiit tallilerneqarnissaannut aningaasalersueqataanissaat pillugu isummersuutaanik tallimanngornermi septembarip 14-iani nal. 10.47 nutarterneqarpoq.

Lars Løkke Rasmussenip mittarfiit pillugit Kim Kielsenimut isumaqatigiissutaa Enhedslistenip Folketingimi partiini kisiartaalluni isornartorsiorpaa.

Partiip nunatsinnut tunngasunut oqaaseqartartua Christian Juhl tusagassiorfinnut nalunaaruteqarluni allappoq, piffissaq taamaaliornissaminut Løkkep toqqagaa akunnappoq, mittarfiimmi sanaartornissaat pillugu inatsit Inatsisartuni  suli akuersissutigineqanngimmat.

AAMMA ATUARUK IA: Nuummi mittarfik siulliunneqassaaq Kangerlussuarlu ineriartortinneqarluni

- Lars Løkke Rasmussen Kalaallit Nunaanni taamaaliornera tulluanngilaq. Nuummimi Ilulissanilu mittarfiit ilumut tallilerneqassanersut maanna oqallisigineqaleruttorpoq. Taava Løkke aningaasarpassuarnik neqerooruteqariataarpoq, tamannalu Kalaallit Nunaanni innuttaasut ilaannit annertuumik iluarineqarani, Christian Juhl taama allappoq.

Enhedslistenip Kalaallit Nunaannut tunngasunut oqaaseqartartuata KNR-imut oqaatigaa Danmarkip nunatsinni mittarfiliortiternermut aningaasalersueqataanissaa tapersersorlugu.

Sanaartornissarli pillugu inatsisip Inatsisartunit akuersissutigineqarnissaa Løkkep utaqqisimasariaqaraluarpaa, tassanimi ilaatigut mittarfiit sorliit tallilerneqassanersut, mittarfiit takissusissaat taamatullu aningaasalersuinissamut pisariaqartinneqartut aalajangersarneqassammata. Neqeroorummi Nuummi Ilulissanilu mittarfiliortiternissat aningaasalersueqataaffiginissaannik imaqarpoq.

- Iluarinngisara tassaavoq ministeriunerup nunami politikkikkut sunniuteqartumik Kalaallit Nunaannukarluni aningaasarpassuarnik neqerooruteqarnera.

Ministeriunerullu Nuuliannginnermini danskit naalakkersuisuisa aningaasalersuinissamik neqeroorutaat pillugu Folketingip Kalaallit Nunaannut tunngasunut ataatsimiititaliaanik ilisimatitsisimannginnera Christian Juhlip aamma isornartorsiorpaa.

SF-ip isornartorsiuineq illuatungileraa

Partiimilu saamerlermi allami, SF-imi, Kalaallit Nunaannut tunngasunut oqaaseqartartup Karsten Høngep Christian Juhlip isornartorsiuinera illuatungilerpaa.

Taanna isumaqarpoq Christian Juhl kalaallinut ´ataqqinninngitsoq´, isumaqaruni Lars Løkke Rasmussen tatisilluni Kim Kielsenimut mittarfiit pillugit isumaqatigiissuteqariartorluni Nuummut ataatsimiigiarsimasoq.

Naalakkersuisummi siulittaasuat oqaloqatigiinnerit aningaasalersuinissamillu isumaqatigiissut peqataaffigisimavai,  Karsten Hønge taama erseqqissaavoq.

AAMMA ATUARUK Erhvervsinvesteringer skal sikre succes med lufthavnene

Danmarkip mittarfinnik aningaaasalersueqataanissamik neqeroorutaa SF-imit tapersersorneqartoq oqaatigaa,  ministeriunerullu Nuuliannginnerani qanoq siunertaqarnera Folketingip Kalaallit Nunaannut tunngasunut ataatsimiititaliaanit ilisimaneqareersoq ilanngullugu oqaatigalugu.

- Isumaqarluinnarpunga Lars Løkkep Folketingimi oqallinnerni tamanna saqqummiuttaraa, ilaatigut naalagaaffeqatigiinneq pillugu maajimi oqallittoqarnerani kingullermi. Tassanimi erseqqilluinnartumik oqaatigaa  tamanna (Danmarkip aningaasalersueqataanissaa, aaqq.) aaqqissuutaasinnaasut ilagigaat. Taamaammat isumaqarpunga Lars Løkkep tamanna pillugu oqaloqatiginissaanut periarfissaqarsimalluta, Karsten Hønge KNR-imut oqarpoq.

Christian Juhlillu danskit naalakkersuisuisa Kalaallit Airports A/S-imut aningaasalersueqataanissamik neqeroorutaat pillugu Folketingimi isumasioqatigiinnissamut ministeriuneq maanna aggersarpaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat