Dansk Folkeparti: Løkkep neqerooruteqarneratigut Kina ingalassimaneqassaaq

Partii Naleqqap Naalakkersuisunit tunuarnera Dansk Folkepartiimit Socialdemokraatinillu tupaallaatigineqarlunilu paasiuminaatsinneqarpoq. Kinalli ingalassimaniarnissaanut danskit naalaagaaffiata mittarfiliortiternissamut aningaasalersueqataanissaa periarfissatuaavoq, Søren Espersen oqarpoq.

Naalakkersuisooqatigiinnit tunuartoqarnera Christiansborgimi uitsatigineqarpoq.

Danskit mittarfiliortiternissamut aningaasalersueqataanissamik neqerooruteqarniarnerat pissutigalugu Partii Naleqqap naalakkersuisooqataajunnaarnera, danskit naalakkersuisuisa tapersersortaanni Dansk Folkepartiimi siulittaasup tulliata nunatsinnillu tunngatillugu oqaaseqartartup Søren Espersenip paasiuminaatsittupilussuuaa.

AAMMA ATUARUK Partii Naleraq Naalakkersuisooqatigiinnit peqataajunnaartoq

- Tupigusuutigisupilussuuara. Danmarkip mittarfiliortiternissamut aningaasaliinissamik neqeroorutaani ammasumi Kalaallit Nunaata Kinamit tiguarneqarnissaata ingalassimanissaa siunertaavoq. Tamannalu taamatut tiguneqarnera  akuerisinnaanngilluinnarpara, KNR-imut oqarpoq.

DF: Mittarfiliortiternerit tapersersunngilagut

Nunatsinni mittarfiliortiternissamik suliniutit pillugit pilersaaruteqartoqarnera Dansk Folkepartiip tapersersunngilaa, taamaattorli danskit naalakkersuisuisa danskit akileraartartut aningaasaataat atorlugit suliniummut aningaasaliissuteqarniarnerat taperserlugu. Nunatsinni attaveqarnermut Kinamiut aningaasalersuinissaat pinngitsoortinniarlugu Dansk Folkepartii taama tapersiivoq.

- Tamannami Kinap kommunistit kisermaasillutik aqutaata Kalaallit Nunaannit ingalassimaniarnissaanut periarfissaavoq. Tamannalu aningaasanik atuiffigerusupparput, Søren Espersen oqarpoq.

Taanna isumaqarpoq Naalagaaffeqatigiit nunanut allanut sillimaniarnermullu politikkiata Folketingimit danskillu naalakkersuisuinit aqunneqarnera Inatsisartuni politikerit akuerisariaqaraat.

Søren Espersenili isumaqarpoq danskit mittarfiliortiternermut aningaasaleeqataanissaannut Partii Naleqqap akerliunera erseqqissoq pissutigalugu Kim Kielsen qinersinissamik suaaruteqartariaqartoq.

- Isumaqarpunga qinersinermik kinguneqartariaqaraluartoq, inuiaqatigiit kalaallit erseqqissumik ima aperalugit: Nunanut allanut sillimaniarnikkullu politikkimut tunngatillugu naalagaaffeqatigiit peqataaffiginissaat suli kissaatigineqarpa? Imaluunniit nunatut namminersortutut ingerlasoqarusuppa, tamatuma kingunerisassai akueralugit?

Socialdemokraatit: Paasiuminaatsupilussuuvoq

Partii Naleqqap naalakkersuisooqatigiinnit tunuarnera Socialdemokraatit Kalaallit Nunaannut tunngasunut oqaaseqartartuata Karin Gaarstedip aamma paasiuminaatsippaa. Partiip siulittaasuata Hans Enoksenip 'naalagaaffiup (nunatsinni, aaqq.) politikkimut toqqaannartumik akuliunneranik, taamatullu kalaallit nammineersinnaanerannut annertuumik apeqqusiineranik'  oqaaseqarnera paasisinnaannginnerarpaa. 

AAMMA ATUARUK Naak politikkikkut sammiveqanngittoqaraluartoq Løkkep ataatsimeeqatiginissaa piviusunngussaaq

- Danskit ministeriunerata Kalaallit Nunaannukarnertaa - aningaasaleeqataanissamut aningaasanik nassarluni - matumani oqaatigineqartutut eqqarsalertoqarneranut pissutaasinnaanera paasiuminaatsippara.

Lars Løkke Rasmussenip nunatsinni attaveqarnermut aningaasalersuinissamik siunertaqarnera Socialdemokraatit tapersersorpaat.

- Paarlattuaminni isumaqarpunga Folketingimi ukiorpassuarni sulininni Kalaallit Nunaannit ilaasortanit tusartarlugu Danmarkip Kalaallit Nunaanni aningaasalersueqataanissaa kissaatigineqartoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat