Assi: KNR

Isumaqatigiissut: Løkkep danskit mittarfinnut aningaasaliissutaat illersorpaa

Nuummi Ilulissanilu mittarfinnit sinneqartoorutinit Danmark pissarsiaqassaaq. Taava aamma Kalaallit Nunaata Danmarkillu kissaatigippassuk, naalagaaffik piginneqataajunnaarsinnaasoq, Lars Løkke Rasmussenip Kim Kielsen pingasunngornermi ataatsimeeqatigigamiuk tamanna erseqqissarpaa.

- Kalaallit suliniutigaat, kalaallit attaveqaqatigiinnerat pivarput kalaallillu oqartussaasui siullertut inissisimallutik, ministeriuneq, Lars Løkke Rasmussen pingasunngornermi oqarpoq.

- Uagulli annertulaamik piginneqataassuteqarluta ilannguppugut. Tassalu tamanna danskit akileraarutaannit aningaasarpassuit aningaasaliissutiginerannik aamma isumaqarpoq. Taamaammat aningaasaliissutit ukua soorunami aamma illersussavarput, ministeriuneq oqarpoq.

AAMMA ATUARUK Kim Kielsen Lars Løkke Rasmussenilu mittarfiliortiternissaq pillugu isumaqatigiissusioqqipput

Ministeriuneq Naalakkersuisullu siulittaasuat, Kim Kielsen Københavnimi ministeriuneqarfimmi pingasunngornermi ataatsimiipput, tassanilu naalagaaffiup Nuummi Ilulissanilu mittarfinnut, Kalaallit Airports International A/S-imi maanna ataatsimoortunik inissinneqarsimasunut, ilassutitut isumaqatigiissut atsiorpaat.

Danmarkip Nunatsinni mittarfinnut aningaasaliinera
* Naalagaaffik Nuummi Ilulissanilu mittarfinnut 700 mio. koruuninik aningaasaliivoq. Naalagaaffiup taamaalilluni mittarfiit marluk 33,3 procentimik piginneqataaffigisinnaalerpai
* Den Nordiske Investeringsbankimit 450 mio. koruuninik atorniartoqarpoq, naalagaaffillu atornermut qularnaveeqqusiisuuvoq, taamaalilluni atukkanit erniat appasissinnaallutik.
* Naalagaaffik aningaasaliissutinik pisariaqartitat sinnerinut 450 millionit koruuninik erniakitsumik taarsigassarsisitsissaaq.
* Naalakkersuisut Naalagaaffillu 220 mio. koruuninik sanitigut aningaasaliipput, taakku Nunatsinni inuussutissarsiornerup ineriartortinneranut atorneqassapput.

Danmark mittarfinnut marlunnut 700 millionit koruuninik aningaasaliilluni suliffeqarfiup pingajorarterutaanik piginnittuulerpoq.

Naalli Namminersorlutik Oqartussat pingaarnertut piginnittuullutik Nunatsinni timmisartuussisarnermik ineriartortitsisuusussaagaluartut danskit naalakkersuisui naalagaaffiup aningaasaliissutaannik qulakkeerinnittussaasut, Lars Løkke Rasmussen erseqqissaavoq.

- Kalaallit Nunaat ineriartortinneqartussaavoq. Kisianni ikinnerussuteqarluta piginneqataagaluarluta arlaatigut ima ineriartortoqarpat, ima eqqarsalerluta: ‘uani aningaasaliissutivut aarlerinartumiippoq’ taava oqaaseqarsinnaatitaassaagut.

Qallunaat peqataajunnaarnissaat isumaqatigiinniarnikkut pissaaq

Danmarkip Kalaallit Airports Internationation A/S-imut piginneqataassutaa piginneqatigiissuteqarnissamik isumaqatigiissutip immikkualuttortai tamanut suli saqqummiunneqanngillat.

Naalakkersuisulli Danmarkimilu aningaasaqarnermut ministereqarfiup ukiakkut 2018-imi februaarimi isumaqatigiissutaani ersittutut, illuatungeriit allamik isumaqatigiissuteqarnissaasa tungaannut, naalagaaffik piginneqataasuussasoq,  Lars Løkke Rasmussen oqarpoq.

- Kalaallit soorlu oqassappata: ‘Danskit aningaasaliissutaat peerusuppagut’, taava soorunami tamanna ammaffigissagipput isumaqatigiissutigaarput, kisianni isumaqatigiinniartoqaqqaassaaq, Løkke Rasmussen oqarpoq, nangillunilu:

AAMMA ATUARUK Danmarkimut Kalaallit Airportsimi pissaaneqalersitsisoq

- Tassami imaassinnaanngilaq qallunaat akileraartartut aningaasaataat piffimmi nalorniffiusumi atugassanngortikkigut annaariaannanngorlugillu, taava ineriartorneq mumilluni iluanaaarfiuleriataarnerani peqataajunnaarsitaalluta.

Suliffeqarfinni ikinnerussuteqarlutik piginneqataasut itigartitsisinnaasarnerat nalinginnaasorujussuusoq, aammattaarlu kikkut suliffeqarfimmik piginnittuussanerannik apeqqummi taamaattartoq, KNR-ip novembarimi allaaseraa.

Inatsisartuni ataatsimiititaliap piginneqataanissamut isumaqatigiissut akuerissagaa

Danmarkip Nuummi Ilulissanilu mittarfinnut piginneqataanissamut isumaqatigiissutissavia suli atsiorneqanngilaq, taamaammallu inatsisitigut suli pituttuisuunani. Isumaqatigiissulli Inatsisartuni Aningaasaqarnermut Akileraartarnermullu ataatsimiititaliamit akuerineqaruni pituttuisuulissaaq.

‘Naalakkersuisut naatsorsuutigaat isumaqatigiissutit ilaannik pingaaruteqarnerusunik Inatsisartut Aningaasaqarnermut Akileraartarnermullu Ataatsimiititaliaat peqatigalugu piginnittunut isumaqatigiissut atuutsinneqalinnginneranni eqqartorneqassasoq.’, Kielsenip Løkkellu pingasunngornermi isumaqatigiissutaanni allassimavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat