Løkke Mette Frederiksenimut: Matuersaatit atukkiussaannaapput

Lars Løkke Rasmussenip aatsaat misilinngilaa: Ministeriunertut tunuarluni ministeriuneqarfimmullu matuersaatit allamut tunniullugit.

Venstrep siulittaasuata ministeriuneqarfimmut matuersaatit Mette Frederiksenimut ullumi sisamanngornermi tunniuppai.

- Ministeriuninngorninni qamannga pisumik pilluaqqorusuppakkit, Løkke oqarpoq nangillunilu:

- Ministeriuneqarfimmut matuersaatit ukiut sisamakkuutaarlugit socialdemokraatimut tunniuttarpakka. Tamannalu matuersaatit atukkiussaannaanerinik naqissusiivoq, Løkke oqarpoq.

Lars Løkke Rasmussen 2009-mi apriilip tallimaanit 2011-mi oktobarip pingajuata tungaanut ministeriunertut atuuffeqaqqaarpoq. Ministeriuneqarfimmut matuersaatit Socialdemokraatit taamanikkut siulittaasuannut Helle Thorning-Schmidtimut tunniuppai.

Matuersaatit atukkiussaannaanerat taamani aamma oqaatigaa. Løkke 2015-imi qinersisoqarmat ministeriuninngoqqippoq.

Løkkep qinersinermi ajorsassaguni Venstremi siulittaasutut tunuarniarani qineqqusaarnermi erseqqissaatigaa.

- Qineqqusaarneq qaangiutereerpoq, taamaammat pissutsinik kusassaanissaq pisariaaruppoq. Oqaannartorsinnaavorlu, Danmark aatsaat sukaruttorpoq

- Aningaasanik isertitaqarneq qaffasissumiippoq, suliffissaqartitsineq qaffasissumiippoq nunanilu allamiunut politikki nakkutigilluarneqarpoq. Taamaammat Danmark sukaruttortoq ilinnut ingerlateqqissinnaavara, Løkke oqarpoq.

Ministeriuninngortup Mette Frederiksenip (S) Løkkemut tunissutaa tassaavoq Tour de Francemi qaqqatigoornermi siuttup tujuuluaraa toortarnilik. Venstrep siulittaasua sikkilinik sukkaniunnernik nuannarisaqartuuvoq namminerlu aamma sikkilerneq nuannarisaralugu.

Løkkep Mette Frederiksenimut tunniussai tassaapput qarliit aaqqatillu sullisit. Sulisussanngorpormi, Løkke oqarpoq.

/ritzau/