Københavnip Uumasuusivissuani issittoq pillugu immikkoortortaq nutaaq
Nannut naluttarfiat nutaaq, aamma ullumi tamanut ammarneqartussaq, igalaaminermik sulluliorneqarsimavoq, nannullu naluttarfimmiitillugit sammivinnit tamanit isiginnaarneqarsinnaallutik. Minnerunngitsumillu - nannut marluusut - Ivanip Noelillu - aamma illit isiginnaarsinnaavaatsit.
Nanuusivik qangali pitsanngorsartariaqarsimavoq. Atorunnaartoq 1951-imi atoqqaartinneqarpoq. Uumasuusivissuarmi sulisut nannut nutaanik avatangiiseqalernermikkut ukiuni tullerni piaqqiorsinnaanissaat neriuutigaat.
Nanuusivittaap saniatigut aamma puisit timmissallu atlantikumit avannarlermeersut issittoq pillugu immikkoortortaami nutaanik angerlarsimaffittaartinneqarsimapput; timmissat innami iniliuunneqarsimapput - aalisakkanillu immap iluani malersuisut isiginnaarneqarsinnaallutik - puisillu naluttarfiat nannut naluttarfiannut igalaaginnarmik avissaarsimatinneqarpoq.
Danmarkimi aviisit nannut naluttut assinginik alutornavissunik ulluni kingullerni naammattorsuarnik saqqummiussisarput, Uumasuusivissuullu immikkoortortaq nutaaq annertuumik pilerisaaruteqarluni saqqummiullugu. Pinngortitaq pillugu nunarsuaq tamakkerlugu suliniaqatigiiffiup WWF-ip Uumasuusivissuaq Kristeligt Dagbladimi ullumi saqqummersumi nersualaarpaa.
- Uumasut pillugit ilisimasavut amerliartortillugit, taakkununnga ataqqinninnerput alliartortarpoq paasisaqarfiginerusulersarpagullu, suliniaqatigiiffimmi allattaaneq Gitte Seeberg oqarpoq.
Immikkoortortaq 150 millioner koruuninik akeqarpoq, A. P. Møller og Hustru Chastine Mc-Kinney Møllers Fondilu aningaasaliisuulluni.
Erinarsoqatigiit Aavaat Issittoq pillugu immikkoortortap ullumi ammaanersiorneqarnerani erinarsorput.