Københavnimiut suaasatuutsinneqartut
Suliniaqatigiiffik Inuit Sila, ukiuni kingullerni marlunni immikkut ittunik suliniuteqartartup ippassaq suaasallernera iluatsilluartoq, suliniaqatigiiffimmi aaqqissuisoq, Ole Ørum oqarpoq.
- Suliniupput una iluatsilluarpoq, tusagassiortunit malinnaavigineqarluarpugut inuppassuillu alaatsinaattut imaaginnavillutik. Puisinniartarneq pillugu suliniupput politikerinit inuinnarnillu paasineqaleriartortoq amma malunnarluarpoq, Ole Ørum oqarpoq.
Inuit Silap suaasanik sassaallernera DR-ip aamma TV2-p malinnaavigaat, taamatullu aviisini tusagassiortunit amerlasuunit aamma malinnaavigineqarluarlutik.
Danskit iggarissorsuit marluk TV-kkullu aallakaatitsisartut, Nikolaj Kirk aamma Mikkel Maarbjerg, suaasanik igasuupput. Taakku Nunatsinniittareerput piniartunillu ilaqarlutik piniariartarlutik. Tassalu tamannarpiaq pissutigalugu igasut taakku suliniummut peqataarusussimapput.
- Kalaallit Nunaanni piniartut nalunngisakka piniarnermillu inuussutissarsiuteqartut eqqugaapput pitsaanngitsumik, tamannalu uggornarpoq. Piniartut piniakkanillu inuuniuteqartut ajunngitsumik inuuneqarnissaat eqqarsaatigineqartariaqarpoq killilersuilinnginnermi, igasoq Nikolaj Kirk naggasiivoq.
