Københavnimiut saammaasseqatigiinnissaq pillugu oqallitsinneqalersut
Københavnip Universitetiani tallimanngorpat septembarip 19-iani nal. 13.00 tamanut ammasumik oqallitsitsisoqalerpat, Københavnimiut saammasseqatigiinnissaq pillugu isummersoqataasinnaassapput.
AAMMA ATUARUK Aleqa: Saammaasseqatigiinnissaq pisariaqarpoq
Saammaasseqatigiinnissaq pillugu isumattorsaqatigiinnermik taaneqartoq tallimanngorpat septembarip 19-iani pissaaq. Oqaluttuarisaanermik ilisimatusartoq Jens Heinrich, atuakkiortoq Kim Leine, taalliortoq Jessie Kleemann, filmiliortartoq Aká Hansen atuakkiortorlu Iben Mondrup saammaasseqatigiinnissaq namminnertik isummatik aallaavigalugit oqallisigissavaat, aammattaaq saammaasseqatigiinnissamik suliaq politikkikkut nalilersuiffigineqassasoq aaqqissuisunit neriorsuutigineqarpoq.
Filmilianik festivalertitsinerup Greenland Eyesip Københavnimi ingerlanneqarneranut atatillugu oqallitsitsineq pissaaq.
AAMMA ATUARUK Helle Thorning-Schmidtip ataatsimiititaliassami peqataajumannginnera isornartorsiorneqarpoq
- Danmark matumunnga peqataaniarani aalajangersimavoq. Taamaammat saammaasseqatigiinnissaq eqqumiitsuliorneq aqqutigalugu soorpiaanersoq eqqartuiffigissallugu toqqarparput, saammaasseqatigiinnissaq pillugu oqallitsitsinermik aammalu filmilianik feistivalimik aaqqissuisuusoq oqarpoq.
- Isumattorsaqatigiinnermi tunngavigineqartussaq tassaavoq, saammaasseqatigiinnissaq siammasissumik, quianarsinnaasumik, tigussaasumik, imminut oqaluttuarerpalaartumik, ilisarnaasersorluni aammalu naalakkersuinermut tunngatillugu nassuiarneqarnissaa. Saammaasseqatigiinnissamik suliamut allaanerusumik tunniussaqarusuppugut, Ivalo Frank nassuiaavoq.
