Københavnimiittoq Restaurant Noma pitsaanernut ilaavoq
Nerisassiassat pitsaasut, avatangiisit immikkut ittut iggavimmilu isumassarsiullaqqissuseq, tamakkuupput nunarsuarmi neriniartarfiit pitsaanersaattut isigineqassagaanni eqqarsaatigineqartariaqartut. Taamatut ingerlatsisut ilaat tassaavoq Københavnimi Christianshavnimi neriniartarfik Restaurant Noma.
Allattoq Louise M. Kleemann
apriilip 22-at 2008 11:41
Noma, nerisassiornerup silarsuaani ullorissanik Michelin-inik taaneqartartunik marlunnik pissarsereersoq, nunarsuarmi neriniartarfiit pitsaanersaasa qulingattut toqqarneqarsimavoq. Siorna normu 15-iugaluarpoq.
Nomami nerisassiarineqartartut Skandinaviameersuupput – ilaatigut nunatsinneersut – nerisassanut ilaallutik qeqqussat, pupiit aamma umimmaat neqaat. Toqqaanermut atatillugu oqaatigineqarpoq ”iggaviup pisortaata René Redzepi-p skandinaviamiut iggavianni killissat qaangeramigit nersorniarneqarpoq”.
Neriniartarfiit nunarsuarmi pitsaanerpaat nerisassiaannik ussiiniaraanni Spanialianngikkaanni Londoniliartariaqarpoq. Tassami neriniartarfik El Bulli Cataloniamiittoq ajugaatinneqarmat tulliullunilu The Fat Duck Londonimiittoq.
