Københavnimi unnuk kulturisiornermi Kalaallit Nunaat akuulluinnassaaq
Assiliisartoq akissarsisitaq John McConnigo Tasiilamiit Tunumiillu assilisamink Kongens Nytorvimi saqqummersitsivoq, Det Europæiske Miljøagenturip illutaani.
Kalaallit Illuutaata Løvstræde-miittup silap pissusaata allanngoriartornera sammissallugu aalajangersimavoq. Islandimiut, kalaallit danskillu eqqumiitsuiortut suleqatigiillutik saqqummersitsissapput, saqqummersitassaat taaguuteqarluni ”Apummit iminngortoq”, ”Smeltevand”, kaajaluisamilu sermiminersuaq inissinneqareersimavoq.
Filmiliortartut Isak Kleist Bertrand Lozayilu oqalugiassapput, oqaluttuallammassuit Hans laurens, Vigga Bro aamma Kasper Sørensenilu oqaluttuassapput, Simon Lynge aamma erinarsoqatigiit Aavaat tusarnaartitsissapput, ilusilersuisartullu Arctic Designers atisanik takutitsissallutik.
Katersugaasivik, Geologisk Museum, Københavnimi unnuk kulturisiornermut atatillugu ineeraliorsimavoq sermersuaq qanoq isikkoqarnersoq tassani takutinniarneqarluni, sermimi qillerisarneq aputillu iminnguuttarnera pillugu oqalugiartoqassaaq. Issittuni pissutsinik Ilisimatusarfimmi enzymit bakteriallu Kalaallit Nunaanneersut oqalugiaatigineqassapput. Taavalu Niels Bohr Institutimi takutinneqassaaq sermimi qillerisartut qanoq inuusartut oqaluttuarineqassaarlu nunarsuatsinni ukiut 120.000-it matuma siorna qanoq kiatsigisimanersoq.
