Københavnimi pinerleeriartoqarnerani inuk ataaseq toqutaavoq pingasullu ikiligaallutik

Svenskeq titartaasartoq Lars Vilks, profetimik Muuamaamik titartaasimasoq Københavnimi ullumi pinerleriarneqarpoq.

Muuamaamik titartaasumut sakkortuumik eqqaassisoqarnerani inuk ataaseq toqutaasimasoq politiillu pingasut ikiligaasut, Københavnimi politiit Danmarkimi tusagassiorfinnut uppernarsarpaat.

Toqutaasoq tassaavoq innuttaasut ilaat 40-nik ukiulik.

Eqqaassisut marluk suli tigusarineqanngitsut, politiit oqaatigaat. Taakku biilimik VW Polomik qimaapput. Danmarkimi nalunaaqutaq naapertorlugu unnummut arfininngulersoq biili taanna Østerbromi qimanneqarsimasoq nanineqarpoq.

Eqqaassisut marluk eqqarasuartaammik sakkoqarlutik Østerbromi kaffisorniartarfimmi Krudttøndenimi ataatsimiittunut oqallittunut eqqaassipput.

Svenskeq muuamaamik titartaasoq kaffisorniartarfimmi oqallittunut peqataavoq, oqallinnermi qulequtarineqarluni "Eqqumiitsuliorneq, Guutimik mitaatiginninneq aamma killiligaanani oqaaseqarsinnaatitaaneq".

Eqqaassineq peqqarniisaarnertut isigineqarpoq.

Tusagassiortoq Jens Konrad pisoqarfiusumit ima oqaluttuarpoq:

- Inissisimaffigisannit, tassa aqqusinermi politiinit assersorneqartumi siullermiittumit takusinnaavara bussi angisooq taakkuteqammersoq, tassani allassimavoq inunnik qimarngussuineq.

Qularnanngitsumik isiginnittuusimasunik politiit qimarngussinerminni atugassaat.

Aamma politiit immikkut sungiusarsimasut takkussimapput, tassa politiitut nalinginnartut isikkoqanngitsut. Nammineq kajumissutsiminnik sakkutuujusut inuillu niaqortik tamakkerlugu asserssimatitsisut, tassa politiit immikkut sungiusarsimasut maaniipput, aamma sakkutuut biillii misissueqqissaarnermi maanna aallartinneqartumi atorneqatussat takkussimapput.

Kisianni susoqarpiarnersoq suli ilisimanngilarput, politiimmi pisortatigoortumik suli nalunaaruteqanngimmata, Jens Konrad oqarpoq.