Københavnimi pikialaartitsinermi kalaallit nittarsaanneqartut
Ukiut tamaasa ingerlanneqartartumi, Song Writer Festival-imi, kalaallinik nipilersortartunik amerlagaatsiartunik ukioq manna peqataasoqassaaq. Nipilersortartut kalaallit tallimat peqataassapput, tamannalu festivalimik aaqqissuusisup, amerikamiup Brett Perkinsip Nunatsinnut asanninneranut takussutissaavoq.
- Kalaallit Nunaat uummatinni peersitassaanngitsumik inissisimavoq. Kalaallit Nunaat ilisarisimalerpara, erinarsortartoq Simon Lynge USA-mi nipilersoqatigalugu angalaaqatiginerani, tamatumalu kingorna 2001-imi Kalaallit Nunaaliaqatiginerani, Brett Perkins oqarpoq nangillunilu oqaatigalugu siullerpaamik Kalaallit Nunaat takoqqaaramiuk asannilersoorfigisutut issimalluni imminullu neriorsorsimalluni nuna kusanartorsuaq uterfigeqqikkumaarlugu, taamaaliorsimallunilumi.
Kalaallit nipilersortartut Perkinsip ilisarisimalernerulerpai, siorna aasakkut Qaqortumi taalliortarneq pillugu paasisitsiniaallunilu pikkorissartitsinermini.
Købernhavnimi kalaallit nipilersortartut peqataatinneqarneri politikkikkut oqariartuuteqarnermik aamma tunngaveqarpoq.
- Kalaallit Nunaat Savalimmiullu pillugit Danmark immikkut oqaluttuassartaqarpoq. Uangalu nammineq nunaga, USA nunat taakku marluk inuinut kusanarpianngitsumik pissusilersortarsimavoq, taamaattumik tamakku pinerullugit Københavnimi festivalimi, kalaallinik Savalimmiormiunillu nipilersortartunik peqataatitaqarpugut.
Festivalimik aaqqissuussisoq, Brett Perkins taama oqarpoq.
Nipierlsornermik tusarnaartitsisussat kalaallit ilagaat, Small Time Giants peqataanissaminnut immikkut erinarsuusiorsimasut aamma peqataassallutik Varna, Malou Rohmann, Kristian Mikkelsen taanna Inuit Freet-imeersoq aamma Simon Lynge-p qatanngutaa Jonas Lynge.
Festivali aningaasaliiffigineqarpoq Nunat Avannarliit Kulturikkut aningaasaateqarfiannit, tusarnaartitsisaqattaarnerillu pissallutik Rådhuset eqqaani.
