Københavnimi nunasisut akulerunnerulersinniarlugit siunnersuisooqatigiviinut qinersineq matoqqammerpoq

Københavnimi nunasisut akuunerulersinniarlugit siunnersuisooqatigiviinut qinersineq nalunaaquttap akunneri marluk matuma siorna matuvoq. Taasinerit aqagu aatsaat kisinneqassapput. Københavnip kommuneani nunasisut siunnersuisooqatigiivini kalaallit marluk arlaat sorleq sinniisutut isissanersoq aatsaat kisitsereernerup kingorna paasinarsissaaq.

Kalaallilli tamarmik taasiartorusunngillat.

- Uagutsinnut iluaqutaaneq ajormat taasiartorusunngilanga. Inuuniapiloortorujussuulluta oqartussanut saaffiginnikkaangatta inussiarnisaarfigineqarata matoqqasutullusooq sullissisunit pineqartarpugut. Qineqqusaarutaaginnarniannginnama aamma taasiartorusunngilanga 44-nik ukiulik angerlarsimaffeqanngitsorlu, Jonas Møller oqarpoq.

Taanna ullut tamaasa Kofoedsskolemukartarpoq, tassanilu Radioavisip naammattoorpaa.

Sinniisoqatigiinnut qinigassanngortittup aappaa Nikoline Ziemer isumaqarpoq, Nunasisut siunnersuisooqatigiiffianni kalaallit inissaqartinneqalersimanerat pillugu paasissutissanik amigartunik agguaassisoqarsimasoq, isumaqarluinnarporlu sinniisoqalernissaq pingaaruteqartoq allannguisinnaasorlu:

- Siullermik suliassaraarput inunnik isumaginnittoqarfinni siunnersortit, kalaallit soqutigisaannik eqqumaffiginninnerulersinnissaat. Manna tikillugu naalagaaffeqatigiinnerup iluani innuttaaqataasutut kalaallit isigineqaannartarput, tamannalu allanngortariaqalerpoq. Kalaallit oqaasiisa kulturiatalu inuiaqatigiinnut danskinut qanillisarneqarnissaat suliniutigissallugu pingaaruteqarluinnarpoq, Nikoline Ziemer naggasiivoq.