Københavnimi nagguteerassaaleqineq qaangerneqartoq
Københavnimi nagguteerassaaleqisoqarsimavoq. Niuertarfiup Tranhusetip kalaaliminernik nunatsinnit eqqussuinini ukioq manna unitsippaa, tamannalu pissutigalugu Københavnimi kalaaleqativut nagguteeranngersut qaammatini arlalinni nagguteerarsisinnaasimanngillat. Qujanartumilli maanna aaqqiissutissarsisoqarpoq.
Københavnimi Kalaallit illuutaat illoqarfissuarmi nagguteerassaaleqinermut aaqqiissutissarsisuuvoq. Nagguteeqqanimmi tusaamasanik amerlasuunik pisiortorsimavoq, taakkulu Kalaallit Illuutaanni Løvstrædemiittumi maanna pisiarineqarsinnaalerput.
- Tranhusetiminngaanniit nagguteeqqanik aamma pisisaratta allamik aaqqiissutissarsiortariaqarsimavugut. Tassalu nagguteeqqanik paletsimik ataatsimik nassiussarseqqammerpugut. Taamaammat pisiniaannassaatit - nunguutsigallarnavianngilagut, Kalaallit Illuutaat Facebookkimi quppernermini taama allappoq.
AAMMA ATUARUK Københavnimi kalaaliminissaaleqisoqartoq
Tranhusetip kalaaliminernik nunatsinnit eqqussuiunnaarneratigut nagguteeqqat kisiisa amigaatigineqalinngillat. Tuttulli, puisillu, arferillu umimmaallu neqaannik piserusuttut Kalaallit Illuutaata Løvstrædemiittup ajoraluartumik ikiorsinnaanngilai.
- Tranhusetip nioqquteqarunnaarnerata kingorna kalaaliminernik allanik pissarsiortut amerlaqaat. Qerititsiveqarnikkulli tamanna naammassisinnaanngilarput, nagguteeqqallu saniatigut kalaaliminernik allanik nioqquteqanngilagut, kalaallit illuutaat Facebookkikkut taama allappoq.
