Københavnimi kalaallit inissaqanngitsut ikiorneqassapput
Kalaallit isumaginninnikkut isumagisariaqarnerpaat sullinneqarnerat Københavnip Kommuniata pitsanngorsarniarpaa. Inissaqanngitsut inummik aalajangersimasumik malinnaasulerlugit ingerlatsineq misiliutigalugu ingerlanneqassaaq.
Kalaallit ikiortariaqartut qanittumik malinnaaffigineqassapput inissisimanerallu allanngortinniarneqassalluni. Inissaqanngitsut ‘qaffakkiartorneranni´, inissisimaffimminniiginnaratik ingerlariaqqinnissaannut ikiorneqartassapput; siullermik unnuiffissaannik neqeroorfiginerisigut, taava unnuisarfinni inissarsiornerini, kiisalu inissaannik pissarsiornerini ikiorlugit.
Siunnersuummut aallaaviuvoq kalaallit isumaginninnikkut ikiortariaqartut pillugit nalunaarusiaq, ukioq manna siusinnerusukkut saqqummiunneqartoq. Københavnip Kommunia Isumaginninnermut ministereqarfimmut 600.000 koruuninik qinnuteqarpoq. Kalaallinik ikiortarialinnik malinnaasussap kalaallit inissaaleqisut qulit ukiortaamit qanimut malinnaaffigilissavai.
