Københavnimi inissarsiortut uukapaatinneqariaannaapput

Ilinniarnermut atatillugu ini 150 kvadratmeteriusoq Københavnip qeqqaniittoq qaammammut 2.500 koruunilik, tassaavoq upperisassaarpianngitsoq - piviusunngorsinnaasorli.
Allattoq Najaaraq Egede
juulip 28-at 2009 10:46

Kalaallit Nunaannit Danmarkimut ilinniariarniat isersimanerlutik sisamanngorpat tusarunikku imaassinnaavoq, ilinniartunut inissarsiortorpassuarnut ilannguttut, pingaartumimmi Københavnimi ilinniarfeqarfissuusumi ininik attartugassarsiorneq ajornaasavittarpoq.

Ilinniaqqinniartut aatsaat taama amerlatigipput, Nunatsinneersuinnaallu 350-iupput assersuutigalugu højskolenut ilinniaqqiffiusunut universitetinullu qinnuteqartut.

Ilinniarniartut inissarsiortut uukapaatinneqartarnerat aatsaat taama aamma takussaatigileratarsinnaavoq.

- Ilinniarnerit aallartinneranni inissarsiortunik uukapaatitsiniarnerit amerlanerpaasarput, Henrik Løvig, internet aqqutigalugu inissarsiortarfimmi Boligportal.dk-mi pisortaq taama oqarpoq.

Taamaattumik inissarsiortunut mianersoqqussuteqarput, allagaqaatiminnilu uukapaatinneqannginnissamut eqqumaffigisariaqakkanik arfineq-pingasunik siunnersuuteqarlutik.

- Ilinnialerniat ilaatigut siumoortumik akiliinaveersaartariaqarput, imaluunniit inimik attartornissamut atatillugu isumaqatigiissusisorsimatinnatik inimut akiliissanatik, aamma isumaqatigiissummik misissorluaqqaartinnagu atsiussanngillat, Henrik Løvig oqarpoq.

Danmarkimi ilinnialerniat aamma Jyllandip kangiani politiit sinniisaannit Børge Møller Fransenimit mianersoqquneqarput, misissueqqissaaqquneqarlutillu.