Københavnimi IA SF-ilu suleqatigiilersut
Pingaarnertut suleqatigiissutigineqartussat tassaapput kalaallit Danmarkimi najugaqartut, aammali susassaqarfinnut allanut tunngatillugu IA SF-ilu siunissami suleqatigiinniarput.
- Suleqatigiilernerput aallarnisarlugu Unnummi kulturisiorfimmi SF KBH-p Københavnip Rådhusiani saqqummersitsiviani peqataassaagut. IA KBH-p quppersagaanik agguaasissaagut kalaallillu Danmarkimiittut atugaat pillugit oqaluttuassalluta, IA Københavnimi siulittaasoq Ortu Mørch Olsen oqarpoq.
IA KBH-p quppersakkamik agguaassinermigut kalaallinik isiginnittaatsimit allaanerusumik aammalu kalaallit Danmarkimi unammilligassaannik takutitserusuppoq. SF-ip suleqatigineratigut oqariartuutitik amerlanerusunut apuussinnaavaat taamaaliornikkullu kalaallit Danmarkimiittut pillugit ilisimasanik siammarterisinnaassallutik.
-Kalaallinut tunngasut danskit aalajangiisartuinit pimoorunneqartariaqarnerini suleqatigiinnikkut ersersinneqarpoq. Soorlu assersuutigalugu kalaallit inuiaqatigiinnut akuulersinniarneqarnissaat kiisalu kalaallit ikiortariallit Danmarkimi najugaqartut sullinneqarnerat, Ortu Mørch Olsen oqarpoq.