Københavnimi eqqaanilu peqqinnissaqarfik 600 millioninik sipaassaaq
Peqqissaavinni sulisut 100-lippassuit siorna soraarsinneqarput, napparsimmaviilli suli akisoqalutik. Taamaattumik suli amerlanerit soraarsinneqartussaapput.
Danmarkimi nunap immikkoorutinut siulittaasup Bent Hansenip napparsimmaviit soraarsitseriarlutik allanik atorfinitsitsisarsimaneragaanerat akerlilerpaa. Akissarsiat suli taama qaffasitsisinerat teknikkimik tunngaveqarpoq.
- Inuit soraarsittakkavut soraarnissaannik siumut ilisimatinneqareertarput, taakkua ilaat soraarnerminnut atatillugu akissarsiamik saniatigut ajunngitsorsiassanik pissarsisarput, tassalu imaappoq inuit ullormiit ullormut soraarsiinnarneqarsinnaanngitsut, Bent Hansen oqarpoq.
Bent Hansenilli nunap immikkoortuisa aningaasarsiornermikkut suli assorsuaq ajornartorsiornerat nassuerutigaa.
- Taamaalilluta ukioq mannamut ukiullu tullianut missingersuusiat maleruarniarlugit aalajangersimasunik soraarsitsiortortoqassaaq, amerlangaatsiaqaallu soraarsittariaqakkavut, tassa taamaappoq missingersuutit maleruartussaagatsigik aningaasaqarnikkullu ajalusoorneqarmat. Bent Hansenilli napparsimmavinni soraarsinneqartussat qasserpiaanersut siumut oqaatigisinnaanngilai.
Assersuutigalugu Københavnip peqqinnissaqarfiani Region Hovedstaden-imi napparsimmaviit 13-it aappaagumut missingersuutiniinnaq 400 millioni koruunit missaanniittunik sipaaqquneqarput, taamaakkaluartoq 600 millioni koruuninik sipaarniarlutik aalajangerput, tassa sipaaqqusaareersut 50 procenti sinnerlugu qaangerlugit.
