Københavnimi ataatsimeersuarnissaq inuttassakilliorpoq

Nunanit allanit ataatsimeersuaqataasussanut 20.000-inut akunnittarfinni inissat inniminnerneqarsimagaluartut Nunanut allanut ministereqarfiup taamaatiinnarpai.

Politikerit, naalakkersuisut siuttui naalagaaffimmilu atorfillit ilimagisamit ikinnerit sila pillugu ataatsimeersuarnissami peqataanissaminnut nalunaarsimapput, amerlanerunissaallu naatsorsuutigalugu akunnittarfinni inissanik inniminniisoqarsimagaluarpoq. Nunanut allanut tunngassuteqartunut ministeqarfimmit tamanna uppernarsarneqarpoq, taamaammat inissat 20.000-it taamaatiinnarneqarput. Ataatsimeersuarnissalli qanoq inerneqarnissaa pillugu Nunanut allanut tunngassuteqartunut ministereqarfik suli isumalluarpoq.

Akunnittarfiutillilli sinniisuutitaasa ilaat isumalluarpallaanngilaq. '

Hotel Radissonimi pisortaq, Karim Nielsen, oqarpoq, nammineq isumalluarpallaarani:

- Sila pillugu Københavnimi isumaqatigiissusiornissap oqallisaaqisup piviusunngornissaa uagut ilimagiunnaarparput, Karim Nielsen oqarpoq.

Taassuma ilimagaa ataatsimeersuariat taamaallaat 6-9.000-iussasut, Nunanulli allanut tunngassuteqartunut ministereqarfiup ilimagaa 12-15.000-it peqataajartussasut.

- Taama amerlatigisut aggerniarunnaarlutik maannamut nalunaareerpata, isumaqatigiissutiginiagaq piviusunngornavianngilaq, ataatsimeersuarnernit allanit peqataaffigisartakkannit misilittakkakka taamaapput, Karim Nielsen uteriiserpoq.