Københavnimi angerlarsimaffeqanngitsunut suliniut nutaaq

Kalaallinut angerlarsimaffeqanngitsunut inuuniarnermikkullu ajornartorsiortunut ikiuisussaq suliniut nutaaq allarteqqammerpoq. Suliniut ”Avancement mentor”, siuariartornermut ilitsersuussisutut nutserneqarsinnaasoq, kalaallinut Københavnimi angerlarsimaffeqanngitsunut inuuniarnermikkullu ajornartorsiortunut, marsip ulluisa aallaqaataat aallarnerfigalugu, suliniutaavoq.

Suliniut sivikikkaluarpoq, tassami ukiup tulliani, 2008-mi, aasakkut inaarneqassaaq – Eva Storkbro, Københavnip Kommuneaneersoq, taama oqaluttuarpoq. – kalaallit ajornartorsiortut ikiornissaannut pitsaanerulernissarput suliniummi anguniarneqarpoq, Eva Storkbro oqarpoq.

Kalaallit ajornartorsiortut pillugit paasissutissat sukumiinerusut politikerit ukioq 2005-ip naanerani ujartorpaat. Taamaammallu nalunaarusiaq ”alloriarnerit annikitsut - allanngornerilli angisuut” saqqummiunneqarpoq. Suliniut aallartinneqartoq nalunaarusiap 110-nik qupperneqartup suliniutissatut innersuussutaanit tallimaasunit tigusaavoq.

Suliniummi, nalunaarutip kingorna pilersinneqartumi, kalaallit annerpaamik 15-it attavigineqassapput. Aqqutissaannik ilitsersorneqarnissat pilersarutaavoq, soorlu isumaginninnermut oqartussanut attaveqarneq, inissarsiorneq, peqqinnisaqarfimmullu attaveqalerneq pilersinneqassapput. Ikiorniarneqartut ataasiakkaat siunissamut pilersaarutaannik aqqutissiuussinissaq sulissutiginiarneqarportaaq.

Suliniut 600.000 koruuninik akeqarpoq, socialministeriamiillu aningaasaliiffigineqarpoq. Københavnip kommuniata kalaallit inuuniarnermikkut ajornartorsiortut 140-t missaanniittut nalunaarsorsimavaat.