København illoqarfinni akisunerpaanut ilaavoq

Suliffeqarfik siunnersuisarfik nunani tamalaani atorneqartartoq, Mercer, nunarsuarmi illoqarfinni assigiinngitsuni inuuninarnikut aningaasartuutinik ukiumut marloriarluni misissuisarpoq. Misissuinermi kingullermi København illoqarfiit akisunerpaat qulingannut inissippoq. Taamaattoqarneranut inigisat, nerisassat angallannerullu akisunerat peqqutaatinneqarput.

Jon Sannes, Mercerimi atorfilik, ima oqarpoq:

- Maannakkut København nunarsuarmi illoqarfiit akisunerpaat qulinganni inissisimavoq. Pissutaasoq annerpaaq tassaavoq angallannikkut akit qaffasinnerat, ilaatigut biilit akisunerujussuat pissutaalluni. Aammali pisiassat naliginnaasut allat akii nunarsuarmi illoqarfissuarni allani akigititaasunut nallersuunneqartarput. Massakkumut ineqarnermut akigititaasut qaffasinnerat peqqutaaqataasut annerpaat ilagaat, Jon Sannes oqarpoq.

Københavnip akisunera pissutaalluni ilinniarsimasut tikisillugit suliatortinnissaat ajornakusoorsinnaavoq.

- Illoqarfiup akisunera pissutaalluni nunanit allaniit suliartorniartut tikisinniarnerisa ajornakusoornerulernerannik kinguneqarsinnaavoq. Apeqqutaaginnarporli suliffeqarfiit sulisuminnik Københavnimukartitsissagunik aningaasartuutaat qaffassanersut. Taamaattumik imaaratarsinnaavoq Københavnimut suliartortut ikinnerulersinnaasut, nunarsuarmi ornigassaqqissunut allanut naleqqiullugu, Jon Sannes oqarpoq.

Aaliangersimasumik suliffeqanngikkaanni Københavnimi inuuniarneq ajornakusuulersinnaavoq.

- Pisiassat naliginnaasut qanoq akeqarnerat kikkunnut tamanut attuisarpoq. Illiniagaqarsimanngikkaanni akissarsiakillunilu pisiassanik nalinginnaasunik pisinissaq ajornakusoornerulersinnaavoq. København najorlugu akisuvoq, aningaasaateqanngikkaannilu akisoorujussuusinnaavoq, Jon Sannes oqarpoq.

Mercerip inuuniarnikkut atukkanik misissuisarnera nunarsuarmi taamatut misissuinerit anginersaralugu sukumiinersarigaat Mercerimit oqaatigineqarpoq. Siorna København akisunerpaat arfineq aappaattut inissisimavoq.