Kyotomi isumaqatigiissut

Silaannaap mingutsinneqarnera pillugu FN-ip Montreal-mi ataatsimeersuartitsinerani Kyoto-mi isumaqatigiissummi nunat amerlanerusut peqataalernissaat piviusunngulerpoq, taamaattorli USA, mingutsitsinerpaanut ilaagaluarluni isumaqatigiissummi ilaanianngilaq.

Silaannaap mingutsinneqarnera kiatsikkiartorneralu Montreal-imi FN-imit ataatsimeersuartitsissutigineqarmat, silaannaap mingutsinneqarnerata millisarneqarnissaanut Kyoto-mi isumaqatigiissutip nutarterneqarnissaa ukiullu 2012-p kingornagut atuutiinnarneqarnissaa isumaqatigiissutigineqalerpoq.

Isumaqatigiissutaagallartumili USA Saudi Arabialu ilaanngillat, naak USA CO2-mik taaneqartartumik nunarsuarmi mingutsitsinerpaanut ilaagaluartoq.

Nunarsuaq tamaat ataatsimut isigalugu USA silaannarmi sisamaraarterummik CO2-mik mingutsitsisuuvoq.

Kyoto-mi isumaqatigiissut nutartigaq, unnuap ingerlanerani naammassineqartoq, nunani assigiinngitsuni ministerinit atsiorneqassaaq.

Danmarkimi avatangiisit pillugit ministeri Connie Hedegaard, silaannaap allanngoriartornera pillugu aasaq manna nunat assigiinngitsut Ilulissanut aggersarpai, tamannalu nunarpassuarnit tupaallatsitsisimavoq. Tassani sermersuup aakkiartornera qanoq sukkatigisoq paasineqarpoq. Taamaammat silaannarmik mingutsitsinerup millisarneqarnissaa, nunanit assigiinngitsorpassuarnit soqutigineqarluinnartoq, Connie Hedegaard oqarpoq.

-Nunat piitsut mingutsitsiffiusartut amerlaqisut maannakkut Kyoto-mi isumaqatigiissummut malinninnialersaalertut, Connie Hedegaard oqarpoq.

Connie Hedegaard aamma neriukkaluarpoq, USA-p Saudi Arabiallu isumaqatigiissummi ilaanissaat, malunnarsereernerarpaali USA Kyoto-mi isumaqatigiissummut ilaanianngitsoq.