Kyotomi atsiugaq eqqortissinnaajunnaarpaat
Nukissiornerit pillugit pilersaarutaasumik suliniutit Inatsisartut aningaasaqarnermut ataatsimiititaliaata 641.000 kr.nik aningaasaliiffigiumanngilai. Kingunerissavaa Naalagaaffiit Peqatigiit 2007-imi aaqqissugaanik, silaannaap pissusaata nalunaarusiarineqarnerata Kalaallit Nunaata saqqummiussisinnaajunnaarnera, taamaalillutillu Naalakkersuisut Kyoto-mi isumaqatigiissut atsiugartik piviusunngortinngitsuulerpaat.
Ukiumut 2005-imut aningaasanut inatsisissap sisamanngormat uippakajaarnaqisumik oqaluuserinerata inerneraa Naatsorsueqqissaartarfiup nukissaqarneq pillugu nalunaarusiornissamut aningaasaliifigineqanngitsoormat. Pilersaarutit ingerlariaqqinnissaannut aappaagu 641.000 kr.-nik 2006-imilu 461.000 kr.-nik atorfissaqartitsissalluni Naatsorsueqqissaartarfik nalunaaruteqareeraluarpoq.
Nunarsuarmioqataasutut nunatta pisussaaffimminik takussutissiissutissarigaluarpaa nukissiuteqarneq pillugu nalunaarusiornissaq, Lars Pedersen Naatsorsueqqissaartarfiup pisortaa oqarpoq, qanorlu kinguneqarsinnaanera aningaasaqarnermut ataatsimiititaliamiut allakkatigut erseqqissaatigisimallugu. Kyoto-mi nunarput sinnerlugu Danmark-ip atsiugaa taamaalilluni Naalagaaffiit Peqatigiit anguniagaat 2007-inngortinnagu nalunaarusiap inaarneqarsinnaanera eqqortinneqarsinnaajussaaq.
Aappaagumut aningaasanut inatsisissap oqaluuserineqarnera Avatangiisinut Pinngortitamillu nakkutilliinermut Qullersaqarfiup qanimut malinnaaffigisimavaa, uppernarsillugulu 2005-imut aningaasaliisoqanngitsoq. Qullersaqarfiup nunatta qanoq ililluni Kyoto-mi isumaqatigiissutip eqqortinnissaa suli isummerfiginngilaa.
