Kviksølvip inerteqqutaalivinnissaa anguniarneqalerpoq

Aatsitassaq arrortikkuminaatsoq toqunartumik akulik kviksølv, nunarsuaq tamakkerlugu akiorniarlugu Naalagaaffiit Peqatigiit aaqqissugaannik Stockholmimi ulluni makkunani ataatsimiittoqarpoq.
Allattoq Jaaku Lyberth
juunip 07-at 2010 15:14

Ataatsimiinnermi Nunami Namminernermut Avatangiisinut Pinngoritamullu Naalakkersuisoq Anthon Frederiksen, Nunarput sinnerlugu peqataavoq.

Kviksølv akiorniarlugu ataatsimiiinermi aalajangiisartut, immikkut ilisimasallit, atorfillit pinngortitamillu illersuiniaqatigiit, hundredelikkaanik amerlassuseqartut, peqataapput.

Kviksølvip atugaanerata killilersorneqalernissaa Naalagaaffiit Peqatigiinni ilaasortat ataatsimiinneranni isumaqatigiissutissatut siunertarineqarpoq. Isumaqatigiissuteqartoqarpat, kviksølvip atugaanerata inerteqquttaalivinissaanut aqqut siullertut oqaatigineqarpoq.

Kviksølvip atugaanerata nunarsuarmi tamarmi malittarisassiuunneqarnissaanut nunat avannarliit sukumiisumik suleqataasariaqartut, nunat avannarliit avatangiisinut ministerii ataatsimoorlutik allagaqarput.

Kviksølv nunarsuarmi avatangiisinut ulorianaateqarnerpaanut ilaavoq.

Aatsitassaq arrortikkuminaatsoq kviksølv aalisakkanut qalerualinnullu katersuuttarpoq issittumi najugalinnut uumasuinullu annertuumik ajoqusiisarluni, taakkuuppummi immami pisunit inuussuteqartut. Meeqqat ilikkagaqarnerannut sunniuteqartartoq aamma paasineqarnikuuvoq.

Kviksølvip akiorniarneqarneranut isumaqatigiissuteqarnissaq ilimagineqarnerulerpoq, Barack Obamap USA-mi præsidentinngornerata kingorna, kviksølv pillugu USA-p isumaa allanngormat.

Nunat arlaqartut isumaqatigiissuteqarnissamut peqataaniarlutik nalunaarput, Kina aamma isumaqatigiissummut atsioqataaniarluni nalunaarsimasoq, aviisi 3F taamatut allaaserisaqarpoq.