Kviksølvimik mingutsitsineq nunatta akisunaarsinnaavaa

Ullup qeqqanut radioaviisimi oqaluttuaraarput ilisimatuut marluk mingutsitsinerup kinguneri aningaasanngorlugu qanoq naleqartiginersut naatsorsorsimagaat.

Ilisimatuullu naatsorsuinerisa ersersippaat ukiut tamaasa mingutsitsineq inuiaqatigiinnut kalaallinut 362 millioni koruuninik naleqartoq. Aningaasartuutaanerpaavoq meeqqat ilikkarniarnerminnut ajornartorsiutigilersagaat, kingusinnerusukkullu sulisinnaanerisa killeqalerneranik kinguneqassasoq.

Malitsigaalu siunissami isertitassanik annaasaqarneq.

Aningaasartai uterfigilaartigik. Ukiumut aningaasartuutit 362 millioni koruunit ikittuinnaanngillat.

Nunatsinni sunut atorsinnaagaluarpavut.

Assersuutigalugu napparsimmavissuup Dronning Ingrids Hospitalip ukiumut ingerlanneqarnera akilersinnaavaa, allaat 120 millioni koruuninik sinneqartooruteqarluta.

362 millioni koruunit Ilimmarfiup sananerata akianut naapertuuppoq.

Aningaasat nunami angallannermi, attaveqarnermilu sanaartornernut atussagaanni assersuutaasinnaavoq Paamiuni mittarfiliassat marluk nalinganik sanasoqarsinnaanera.

Atlantikoq qulaallugu timmisartut mittarfissaannik arlalinnik sananiarutta ukiut pingasut sisamalluunniit sipaaqqaartariaqassaagut.

Aningaasalli taakkartorneqartut innuttaasunut utertinneqarsinnaapputtaaq; millionerpassuit akileraarutit appartinneqarnissaannut atorneqarsinnaasut.

Kviksølvimik mingutsitsineq nunani allani suliffissuaqarfiusunit pivoq, anorimik sarfamillu ingerlanneqarluni issittumut annguttarluni.