Kviksølvi timimiittoq annertoqaaq

Aatsitassaq ulorianartoq kviksølvi annertungaatsiartoq nunatta imartaani nassaassaavoq, nerisartakkagullu allanngortinngikkutsigit kingunipiloqarsinnaavoq. Issittumi avatangiisimut mingutsitsinerup sunniutaanik misissuisarfiup misissuisimanerata tamanna takutippaa.

- Kviksølvi Kalaallit Nunaata innuttaani nassaassaasoq ima annertutigaaq, nunat tamat akuerisimasaasa quleriaataanik sinnerluguluunniit annertutigaluni, Jens C. Hansen oqarpoq.

Jens C. Hansen misissueqataasunut ilaavoq, maannangaarlu qanoq iliuuseqartoqanngippat ernummatigaa inuit qaratsamikkut qiteqqamikkullu ajoquseriartornissaat.

Inuup aavata kaaviiaarnera, inuullu uummataa aamma ajoquserneqarsinnaasut misissuinerit kingulliit takutippaat.

Aatsitassaq oqimaatsoq kviksølvi uumasuni nerisariinni annertusiartortarpoq. Puisip neqaanik imaluunniit arferup neqaanik nerisaraanni kviksølvi timimiittoq annertusiartortarpoq.

Kviksølvi avatangiisitsinni nassaassaajuarsimavoq. Ukiunili kingullerni nunat suliffissuaqarfiusut kviksølvimik mingutsitsisut amerliartorsimapput.

Issittumi aatsitassamik taassuminnga mingutsitsineq annikittuinnaavoq, kviksølvili silaannakkut immakkulluunniit issittumut pisarluni.

Taamaammat Jens C. Hansenip nerisartakkat pillugit paasisitsiniaasoqarnissaa kissaatigaa. Naartusut nerisarisaasa allanngortinniarneqarnissaat pingaarnersatut taavaa. Misissuinerit takutippaat meeqqat qaratsamikkut ajoqusersinnaasusiat annertunerusartoq, meeqqap ilikkariartorsinnaassusianik eqquisumik.

Issittumi avatangiisinik mingutsitsinerup sunniutigisinnaasaanik misissuisarfiup Århusip universitetianit ingerlanneqarpoq, misissuinerillu 1994-imi aallartissimapput.