Kuupiup akisussaaqataanini nassuerutigaa

- Naalakkersuisut siulittaasuattut akisussaaqataavunga. Kisianni ullumikkut allanngortiterinerit suliassap taassuma kingunerisimavai, aammalu anillariarfiusinnaasutut isumaqatigiissutigisinnaasarput taannaalluni, Kuupik Kleist Naalakkersuisut siulittaasuattut perngaammik naalakkersuisunik ullumi nikisiterisariaqartoq oqarpoq.

Nikisiterineq aningaasaqarnermut naalakkersuisuujunnaartoq Palle Christiansen pingaarnertut inuttaralugu Naalakkersuisut akulikippallaamik amerlavallaanillu saqqummernerlunnerannik peqquteqartumik pisariaqalersimasoq.

Taamaammat Kuupik Kleist naliliivoq, Palle Christiansen aningaasaatinik paarsisutut ingerlaannarsinnaanngitsoq.

- Naalakkersuinikkut eqqissiviilliutaasimasut aallaaveqarput aningaasaqarnermut naalakkersuisup akisussaaffigisaminik ingerlatsisimaneranut tunngassuteqartut, taannalu ullumikkut nikisiterisimanermut pissutaavoq, Naalakkersuisut siulittaasuat oqarpoq.

Taamaammallu naalakkersuisoqatigiit Naalakkersuisuuffiit nutaamik inuttalerniarlugit piffissami kingulermi iluminni noqqoruussimapput.

- Tassa ullut ilungersunartorsiorfiusut aqqusaakkavut eqqarsaatigalugit, inuit arlallit sorparujussuarnik oqaseqarput, soorunalimi. Aamma periarfissanik assigiinngitsunik tikkuartuisoqarluni.

Allaammi oqallinnerit ima sakkortutigisimapput, naalakkersuisoqatigiit ataqqartutut oqaatigineqarsinnaallutik.

Kuupik Kleist ima oqarpoq:

- Tassa aqqusaarsimavagut ullut ilungersunartut.