Kuupik V. Kleist: Naalakkersuisut killormut sammisumik iliuuseqarput
- Annertuumik maluginiagarput tassaavoq uranitalinnik, imaluunniit qinngornernik ulorianartunik akulinnik piiasinnaalernissamut tuniniaasinnaanermullu ammaassiniarneq eqqarsaatigalugu tamanna killormut sammisumik periuseqarfiginiarneqarpasissoq, tassalu aalajangiisinnarluni aatsaat kingornatigut paasissutissanik aammalu paasititsiniaanermik ingerlatsisoqarniartoq, Inuit Ataqatigiit siulittaasuat Kuupik V. Kleist oqarpoq, aatsitassanillu qinngornernik ulorianartunik akulinnik piiaasoqarsinnaalernissaa pillugu kujataani innuttaasut taasitinneqarsinnaanerannik Naalakkersuisut siunniussaat apeqquserpaa, Uummannamilu piiasoqaleratarsinnaanera assersuutigalugu:
- Tulliani Uummannap eqqaaniluunniit uranitalinnik qinngornernilluunniit ulorianartunik akulinnik piiaasoqarniarluni qinnuteqartoqassappat, taava Uummannarmiut kisimi aperineqassappat? Taavalu arlaat angerpat imaluunniit arlaat naameerpat, taava Nunatta ilaani inerteqqutaasoq, Nunattalu ilaani inerteqqutaanngitsoq. Soorlu apeqqutit tamakku saqqummerput, apeqquterpassuit, taamaattumik taamatut nalunaaruteqarneq naammaginngilarput, Naalakkersuisunut siornatigut siulittaasuusimasoq Kuupik V. Kleist oqarpoq.
Naak ammaanermi sammineqartut, Siumup politikkikkut oqaaseqartartuata Per Berthelsenip oqarneratuut siammasittaraluartut, toqqaannartumillu isornarsinnaasunik imaqarneq ajoraluartut, ataasiakkaanik tikkuagassaqartoq, Per Berthelsenip oqaatigaa:
- Aalisarnerup eqqartorneqarneranut atatillugu kinguaariit imminnu taarserlutik Nunatsinni aalisarnerup uummaarissumik ingerlajuarnissaanut qulakkeerinninnissamut tunngassuteqartunut oqaaseqarnissaq taanna amigaatigilaarpara, taavalu aamma amigaatigilaarlugu utoqqalinersiaqartut, ingammik aappariit iluini atugaat, tassalu aappaasoq aningaasarsiorpat, taava utoqqalinersiuteqartoq ilanngaaffigineqartarnerannut tunngasut aaqqiinissamut oqariartuuteqarnissaq taanna Siummuminngaanniit kaammattuutigissallugu saqqummiutissavara, Siumup politikkikkut oqaaseqartartua Per Berthelsen oqarpoq.
Oqallisigissallugit ilaatigut paqumigineqarsinnaasut, soorlu imminut toquttarnerit, kinguaassiutitigullu atornerluisarnerit, Aleqa Hammondip ammaanersiornermi oqalugiaataani sammineqangaatsiarmata, Per Berthelsenip Kuupik V. Kleistillu iluaraat, iliuusissatulli pilersaarutit sukumiinerusut, Kuupik V. Kleistip ujartorpai:
- Isumaqarpunga pissusissamisoorluinnartoq aamma erseqqissuliorfigineqartariaqartut ajornartorsiutiit taama annertutigisut. Isumaqarpunga paquminarunnaarnikuusoq Nunatsinni tamakkuninnga eqqartuinissaq, kisianni amigaatigisarput tassaavoq oqartussaasuninngaanniit suli erseqqinnerusumik immaqaluunniit aamma akulikinnerusumik taamatut pissutsit innerannik akuersaannginnermik oqartoqartariaqarneranik, taamaammat tamakku isumaqatigaagut soorunami, Inuit Ataqatigiit siulittaasuat Kuupik V. Kleist oqarpoq.
