Kuupik: Uuliasiortoqalissagaluarpat Qullissanisut pisoqassanngilaq
Kuupik Kleist Ritzau-imi apersorneqarluni pinngitsoortitsiniaqataassalluni neriorsuivoq.
Qullissat aamarsuarsiortoqarneratigut alliartorput, aamarsuarsiorfilli 1972-imi matummat, illoqarfik aamma matuvoq, inuilu illoqarfinni allani inissiarsuarnut siaruarput.
- Aamma uanga Qullissarmiuuvunga. Taamani pisut timikkut tarnikkullu misigaakka, Kuupik Kleist Ritzauimut oqarpoq.
Taamaammat uuliamik Nunatsinni nassaartoqassagaluarpat, uuliamik qalluisoqarunnaarpat taamatut pisoqaqqinnginnissaa Kuupik Kleist-ip ilungersuutiginiarpa.
Taamaammallu Alaska paasisassarsiorfigisimavaa. Tasamani uuliamik qalluinermi sinneqartoorutinit pissarsiat inunnut ataakkaanut agguaanneqartarput. Kisianni ajornartorsiutaavoq, Alaskami inuusuttorpassuit ilinniagaqanngitsoorsimammata, sukkasuumik aningaasarsiorsinnaanertik pissutigalugu.
- Inuussutissarsiorluni ulapaarnerup kingunerisaanik ajutoorfiusinnaasorpassuaqarpoq eqqumaffigilluinnarneqartariaqartunik. Naluarput ukiut qulit 30-lluunniit qaangiuppata taama pisoqassanersoq, Kuupik Kleist oqarpoq.