Kuupik: USA-mi qinersineq issittumut aamma tunngavoq

USA-mi præsidentimut ullumi qinersisoqarpoq.Inunnik isumasiuinerit kingulliit takutippaat Obama aamma Romney naligiingajattut.
Allattoq Mads Lynge
novembarip 06-at 2012 06:13

USA-mili qinersineq Nunatsinnut qanoq isumaqarpa? Apeqqut taanna Naalakkersuisut siulittaasuannut Kuupik Vandersee Kleistimut ingerlateqqipparput.

- USA-mi præsidentissarsiortarneq aamma USA-mi præsidentip ingerlatsinera Nunarsuarmioqatigiinnut tamanut pingaaruteqartarpoq, USA pissaanilissuartut suli inissisimammat. Uagutsinut pingaartutut eqqarsaatigisassaq tassaassaaq USA-p præsidentia nangikkuni imaluunniit taarserneqaruni Issittoq eqqarsaatigalugu qanoq ingerlatseriaaseqarumaarnersoq aammalu aatsitassarsiornikkut nukissiornikkullu qanoq ingerlatseriaaseqassanersoq, Naalakkersuisut siulittaasuat Kuupik V. Kleist oqarpoq.

- Nalunanngilaq Mitt Romney Obamaminngaanniit immaqa soqqusaannerusumik periuseqarluni qineqqusaartoq aammalu annertuumik Issittumi aatsitassarsiortoqarnissaa aatsitassarsiortoqarnissaanillu siunnerfeqartoq. Taamaammat USA-mi præsidentimut qinersinermi kina qinigaanersoq soorunami apeqqutaassaaq, Kuupik V. Kleist oqarpoq.

USA-mi præsidentit qinigaaffiat ukiunik sisamanik sivisussuseqartarpoq, Nunattalu qinigaaffiup massuma iluani USA-mut atatillugu naammassisassai suunersut aperigatsigu, Naalakkersuisut siulittaasuat ima akivoq:

- Nunatsinninngaanniit pingaartumik illersornissakkut suleqatigiinneq eqqarsaatigalugu tamatuma kinguneranik soorlu niueqatigiinnikkut USA-mik annertunerusumik suleqateqarnissaq ukiualunni kissaatigisimavarput. Kissaativut tamakkua oqartariaqarpunga annikitsuinnarmik naammassineqarsimapput, taamaammat qinigaaffiup tulliani anguniagassanut ilaalluinnarpoq qaninnerusumik niueqatigiinnikkut aammalu Issittumut politikkimut tunngatillugu suleqatigiinnerunissaq, Naalakkersuisut siulittaasuat Kuupik V. Kleist oqarpoq.

USA-mi qinersineq KNR TV-kkut ualeru aallartittussamik malinnaavigineqarsinnaavoq, nalunaaqutaq tallimaniit aallartippat unnuarornerani sorleq qinigaanersoq paasinarsinissaata tungaanut toqqaannartumik malinnaavigineqarsinnaassalluni.

Qanorooq pisarnermisut arfineq-marlunut aallakaatinneqassaaq, USA-mili unnuup sinnera qinersineq malinnaavigineqarsinnaassalluni.