Kuupik: Uranileriunnaarluta aningaasarsiorniarta

Aningaasaqarnermut Siunnersuisoqatigiivisa ukiumoortumik nalunaarusiartik ippassaq marlunngornermi saqqummiukkamikku ilaatigut oqaatigaat, aatsitassarsiorneq ukiut arlaqanngitsut qaangiutinnagit aallartinneqanngippat, aningaasatigut atugassarititaasut aaqqinniarneri ajornakusoortorujussuanngoriaannaasoq.

Siunnersuisoqatigiit taama siulittuinerat, Inatsisartuni illuatungiliuttut Inuit Ataqatigiit siulittaasuata, Kuupik V. Kleistip isumaqatigaa.

- Torben M. Andersen isumaqatigisupilussuuara. Aamma imaappoq, Naalakkersuisut akornanni nalorninerujussuaq tamassumunnga pissutaaqataavoq. Tassami atugassarititaasut erseqqissumik oqaatigisinnaanngikkaanni soorunami aningaasaleerusuttunik qammaaniarneq ajornakusoortorujussuusussaavoq, Kuupik V. Kleist oqarpoq.

Naalakkersuisut pilersaarutigaat uranimik piiaanngilluinnarnissamik apeqqut Inatsisartut ukiaanerani ataatsimiinnerisa nalaani taasissutigitinniarlugu. Kuupik V. Kleistip oqaatigaa, ilaatigut tamannarpiaq pissutigalugu aatsitassarsiorniarneq kinguarsarneqartoq.

- Aamma ima oqartoqarsinnaavoq, uranilerinersuup pilersippaa, periarfissat allat ajornartorsiutitaqanngitsut samminagit, uranisiornissamik uteriisernersuup suna tamaat sunnereramiuk, taamaalillunilu aningaasatigut atugassarititaasut ersernerluttumik eqqartorneqalerlutik.

Kuupik V. Kleistip aamma oqaatigaa, suliniutinik allanik pilersitsinissaq Naalakkersuisut pilersaarutigineqaleraluarpassuk, Inuit Ataqatigiit Siumukkunnut isumaqataasinnaassagaluartut.

- Oqareernittuut, uranimut tunngasunik ukkassinersuup allanik periarfissanik mattussisoqartutut tamanna isikkoqartilerpaa, uffa immaqa ajornartorsiutitaqanngitsumik suliniutit aallartinneqarsinnaagaluit. Taakkulu siuarsaavigalugit suligaluarutta, ikittuarakasiit ajornartorsiutitallit pingaarnerpaajutinnagit periarfissalli piviusut pingaarnerpaajutillugit, taava Siumukkut suleqatigilluarsinnaagaluarpavut.

Inuit Ataqatigiit siulittaasuat, Kuupik V. Kleist taama oqarpoq.