Kuupik: Uraanitalinnik piiaasalernissaq ilimananngilaq

Aatsitassanik uraannitalinnik piiaanissamut apeqqut Naalakkersuisooqatigiit isumaqatigiinngissutigaat.

Uraannitalinnik piiaasinnaanissamut inatsisip allanngortinnissaa misissorneqartariaqartoq, aningaasaqarmermut naalakkersuisup oqariartuutigaa.

- Siullermik oqassuunga isertugaanngimmat naalakkersuisooqatigiit akornanni apeqqummut tassunga tunngassutilimmut assigiinngitsunik isumaqartugut. Aamma naalakkersuisunngortitsinermi isumaqatigiinnitsinni taanna ilanngullugu isumaqatigiissutitsinniippoq, naalakkersuisut siulittaasuat Kuupik Kleist oqarpoq.

Naalakkersuisut siulittaasuat aamma oqarpoq aatsitassarsiornemut inatsisip allatigut allanngortinnissaa sulissutigineqassasoq. Tamannalu pillugu Naalakkersuisut ataatsimiinnerminni taanna anguniarlugu isumaqatigiissuteqarsimapput.

- Aatsitassarsiornermut inatsisip misissoqqinnissaa nutarternissaalu qinigaaffimmi uani ingerlasumi pissasoq isumaqatigiissutiginikuuarput. Taannalu naapertorlugu ingerlaassagut, Kuupik Kleist oqarpoq.

Kuupik Kleist isumaqarpoq inatsimmut allanguinissamut tuaviortoqartariaqanngitsoq, oqaatigalugulu uraanitalinnik piiaanngikkaluarluni Kalaallit Nunaanni periarfissaqarluartoq.

- Aatsitassarsiornikkut nunatsinni maannakkut suliassaaleqisoqanngilaq, uranisiortoqanngikkaluarpalluunniit. Aatsitassarsiornermut tunngasut annertoorujussuit amerlasoorujussuillu maannakkut sullisigineqarput. Taamaattumik eqqartorneqartoq, tassa uranimut politikki allanngortinnissaa uanga tuaviornarnerpaatut isiginngilara. Naak soorunami aningaasarsiorfissanik nutaanik ujarlertariaqarnerput taanna isumaqatigiissutigigaluaripput.

Kalaallit Nunaanni aningaasarsiorfiusinnaasunik ujarlertoqarnissaa aningaasaqarnermut naalakkersuisup ujartorpaa, tassami ukiuni tulliuttuni amerlasuuni ukiumut en millard koruuninik Kalaallit Nunaat sipaartariaqarmat.

Suliffeqarfiit maannakkut ingerlareersut nutaanillu aningaasarsiorfiusinnaasunik ujarlertoqartariaqartoq, Kuupik Kleist oqarpoq.

- Imaanngilaq ukiut tamaasa milliardinik sipaarutissanik ujarlertussaasugut. Uanga isumaga naapertorlugu pingaaruteqarneruvoq aningaasarsiorfissanik nutaanik aammalu aningaasarsiorfissat ineriartortinneratigut isertitassanik nutaanik ujarlernissarput. Taassuma saniatigut soorunami sipaarniartoqassaaq, kisianni milliardit tungaannut sipaarniartoqarnissaa uanga takorloorsinnaanngilara, Kuupik Kleist oqarpoq.

Massakkut suliap ingerlasup qanoq inerneqarsinnaanera sioqqutsisumik oqaatigisinnaannginnerarpaa.

- Kisianni naalakkersuisooqatigiit akornanni assigiinngitsunik isummerfiginikuugipput taanna isertuussassaanngilaq, Kuupik Kleist oqarpoq.

Nuummi IA-p immikkoortortaqarfiata tusagassiutinut nalunaarummi Palle Christiansenip oqaasii sakkortuumik avoqqaarliutigai, isumaqarluni inuit peqqissusaat eqqarsaatigineqartariaqartoq, inatsimmillu allannguiniarneq akisussaassuseqannginnermik takutitsinerusoq.