Kuupik: Ugguarlungalu oqiliallassimaarpunga
Inuit Ataqatigiit inatsisartunut qineqqusaarnermini suliarisimasat annertunerusumik qineqqusaarutigineqarsimannginnerat ilaatigut IA-p kinguarneranut pissutaasunut ilaasoq siulittasoq Kuupik V. Kleist oqarpoq.
IA Siumut-mik suleqatigiinnissamik qaaqquneqaruni piareersimavoq.
- Kinguariarnerput tupaallaatigilaarpara ingasarujussuanngikkaluarpoq, Kuupik V. Kleist oqarpoq, - 2009-imi marloriaatinngorluta qinigaagatta taamak annertuseriarneq taamak sivisutigisumik attakkuminaatsuussasoq taamanikkut nalillerparput.
IAp siulittaasua oqarpoq.
Sanaartornermut tunngasut tassalu sanaartorup Nuup avataani annikinnerunerarlugit pasilliutit aamma sulianut angisunut inatsit kiisaalu qineqqusaarnermi sammineqartorujussuaq taassa aatsitassarsiortut akileraarusersorneqarnissaannut assortuuneq taakkua pillugit qineqqusaarnermi ajunngitsumik saqqummiussimanngilagut qinersisartunut, Kuupik V. Kleist nassuerluni oqarpoq.
Inuit Ataqatigiit qineqqusaarneranni Inuit Ataqatigiit ukiuni kingullerni sisamani suliarisimasaat qineqqusaarutigineqannginnerat Inuit Ataqatigiit qinersisartuisa ikileriarnerannut patsisaasut ilagigaat Kuupik V. Kleist oqarpoq, qineqqusaarnermi siunissamut tunnganerusut sammineqarnerullutik.
Qinersinermi ajugaasup Siumup siulittaasua Aleqa Hammond Danmarks Radiomit apersorneqarluni oqarpoq, ukiut 30it kingulliit ingerlaneranni ukiut 16it IA-mik suleqarteqarsimaneq eqqarsaatigalugu IA-mik suleqatigiissinnaaneq periarfissaasoq.
Qinersinerup naammassineqarnerata kingorna periarfissat ammasutut isikkoqarput, Kuupik V. Kleist oqarpoq, apeqqutaalluinnarpoq isumaqatiginniarnermut ingerlatsisussap oqaloqateqarusussuseqarnera qanoq innersoq, Kuupik V. Kleist oqarpoq.
Inuit Ataqatigiit Siumumik suleqateqalissaguni inuiaqatigiinnut pingaaruteqartut pingasut isumaqatigiissutigineqarsinnaanerat apeqqutaasoq IAp siulittaasua Kuupik V Kleist oqarpoq, aalisarneq, aatsitassarsiornermut tunngasut akileraartarnermullu tunngasut eqqarsaatigalugit taakkua pillugit isumaqatigiissusiortoqarsinnaanersoq apeqqutaassasoq, Kuupik V. Kleist
Inuiaq Ataqatigiit siulersuisuuneri ualeru ataatsimiikkunik, qinersinerup inernera nalilersussaavaat aamma siunissami suleriaasissat kiisalu Siumut-mik naalakkersuisoqateqarsinnaaneq oqaluuserineqassapput