Kuupik suli nuannarineqarnerpaavoq

Naalakkersuisut siulittaasuat Kuupik V. Kleist Naalakkersuisoqatimi akornanni suli nuannarineqarnerpaasoq, HS Analysep isumasiuisitsinerani kingullermi Sermitsiami ippassaq saqqummiunneqartumi atuarneqarsinnaavoq.

Innuttaasut Naalakkersuisunik isumasiuisitsinermi naliliisinneqarput, tassa 1-imit 5-imut Naalakkersuisut karakteerilerneqarlutik.

Kuupik V. Kleist agguaqatigiissillugu 3,49-mik karakteerilerneqarami nuannarineqarnerpaasoq paasinarsivoq, innuttaasunillu siorna novembarimi isumasiuinermut naleqqiullugu nuannarineqarnerulersimalluni.

IA-kkunnik qinersisartut akornanni tupigisassaanngitsumik nuannarineqarnerpaavoq, taakkumi akornanni 4 sinnerlugu karakteerilerneqarami.

Partiinut allanut qinersisartut akornanni Kuupik V. Kleist aamma karakteerilerneqarluarpoq. Siumumik qinersisartunit agguaqatigiissillugu 3,11-nik karakterilerneqarpoq, Demokraatinillu qinersisartut akornanni agguaqatigiissillugu 3,82-imik karakterilerneqarluni, tassa namminneq partiiminni siulittaasuminnit Jens B. Frederiksenimit allaat nuannarineqarnerulluni.

Naalakkersuisuni nuannarineqarnerpaat tullersortaat tassaavoq Peqqissutsimut Naalakkersuisoq Agathe Fontain, Aningaasaqarnermullu Naalakkersuisoq Maliina Abelsen nuannarineqarnerpaanut pingajuulluni.

HS Analysep isumasiuinerani Naalakkersuisuni nuannarineqannginnerpaaq tassaavoq Palle Christiansen, taanna agguaqatigiisillugu 2,23-iinnarnik karakterilerneqarami.