Kuupik: Silaqanngitsuliorneruvoq
Ajornartorsiut nutaajunngilaq, Issittumi Siunnersuisooqatigiit atuunnerini ajornartorsiutaajuaannarsimavoq, peqataajumajunnaarnerlu ajornartorsiummut aaqqiissutissamut qanillattuutaanavianngilaq.
- Naalakkersuisut iliuuserisaat paasiuminaatsilluinnarpara. Issittumi Siunnersuisooqatigiinni ministerit taamaallaat ukioq allortarlugu ataatsimiittarput, ministerillu tamaasa pitsaasumik oqaloqatigineqarsinnaasarneri misilittagaqarfigaara. Kerry Lavorilu marluutillugit imaaliallaannaq oqaloqatigineqarsinnaasanngikkaluarput, Issittumili Siunnersuisooqatigiinni ministerit ataatsimeeqatiginerini tamanna pisinnaasarpoq, Kuupik Kleist knr.gl-imut oqarpoq.
Sverigep Issittumi Siunnersuisooqatigiinnik aqutsisimaneranik Hammondip naammagisaqannginnera Kleistip isumaqatigaa, aamma Kalaallit Nunaata Danmarkillu kisiartaallutik tamakkuninnga ajornartorsiuteqanngillat. Aamma Sverigemi Finlandimilu Saamit Canadamilu nunap immikkoortui tamakkuninnga ajornartorsiuteqarput.
-Issittumi Siunnersuisooqatigiinni tamakkuninnga ajornartorsiuteqarnera pitsaasuunngilaq, Kalaallit Nunaatali toqqarsimasaanit allaanerusunik pitsaanerusunillu iliortoqarsinnaanera qularutiginngilara. Oqaloqatigiinneq akerliussutsimik takutitsinermit pitsaanerujuaannarpoq, aamma peqataanngitsoornikkut sunniuteqaqataasinnaajunnaartoqassaaq, tamannalu uagut pisariaqartinngilarput, Kuupik Kleist nassuiaavoq.
