Kuupik: Piffissaq nukiillu ataatsimoortitsiniarnermut naapigiaanermullu atorneqartariaqarput

Naalakkersuisut siulittaasorisimasaata Kuupik Kleistip (IA) Nunatsinni politikerit nammineq partiimillu soqutigisaat tunulliullugit inuiaqatigiit soqutigisaannik aallussinerunissaannut kaammattorpai. Naalakkersuisoqatigiit iluminni aalassassimaarnerisa aammalu innuttaasut qinerseqqittoqarnissaanik kissaateqarnerisa annertusigaluttuinnartup malitsigisaanik taamatut kaammattuuteqarpoq.
januaarip 14-at 2014 10:14

Kuupik Kleist oqaatigaa nunatsinni politikerit kaammattorpai aaqqinniagassarpassuit utaqqiinnartut isumageqqullugit. Matumanilu Kuupik Kleistip Nunatsinni ajornartorsiorfiunerpaatut suliffissaqartitsiniarneq inuussutissarsiornerlu, minnerunngitsumillu meeqqat atuarfiat eqqaavai.

-Inuiaqatigiinnut iluaqutaasussanik suliaqartussatut qinigaangaluarluta. Aamma tusagassiorfiit tamarmik piffissami sivisuallaalersumi allanik sammisaarussimapput, tullianillu arlaannik uissuumminartumik pisoqarnissaanut naalarniinnalersutut pissuseqarpugut. Tamanna soorunami naammaginanngilaq, Kuupik Kleist isumaqarpoq.

Aalisarnermi inatsisitigut nutarterisariaqarneq, aatsitassarsiornermi nunaqavissut sulisorineqarnissaat, inissaqartitsinikkut aalajangersimanerusunik siunnerfeqartariaqarneq, inuiaqatigiinni angerlarsimaffeqanngitsut Inatsisartuni nukinnik piffissamillu atuiffigineqartariaqaraluarneri aamma oqaatigaa. Taamaaliornikkut uiussuumminartuliat qinersinissamillu oqaluttoqarnera sammineqarpallaarunnaarneqarsinnaassammat.

-Unittooqqaneq avissaartuunnerlu ipianngunartut taarserlugit ataatsimoorluta siunissarput pillugu aallasanniarta. Inatsisartunut ukiorluunniit qaangiutinngitsoq qinersisoqaqqittoqassanersoq matumani isummerfiginngilara. Soorunami allamik saariarfissaarukkaanni tamanna periarfissatut ammatinneqartuaannassaaq, Kuupik Kleist partiini Inuit Ataqatigiit sinnerlugu taama nassuiaavoq.