Kuupik parteeqatimi innersuussutaannut akerliuvoq
Tassami partip siuttui isumaqarput nunap immikkoortuini soqutigisat aamma Nunatta angallannikkut siunissami qanoq aaqqissuunneqarnissaanik kissaatigineqartut aporaaffeqartut.
Matumani issittumi Sakkutooqarfiup Nuumminnissaa pissusissamisoortuusoq siulittaasup Kuupik Kleistippiffissami sivitsortumi oqaatigisarpaa.
Illuatungaanili partiimi politikkikkut oqaaseqartartup Aqqaluaq B. Egedep, kujataaninngaanneersup, taamatullu IA-p Inatsisartuni ilaasortaatitaasa sakkutooqarfiup Narsarsuarmiinnissaa kissaatiginarnerutippaat, ilaatigut Narsarsuarmi Atlantikoq qulaallugu timmisartuussinermut mittarfiup matuneqaqqajaanera taamaalilluni pinngitsoortinneqarsinnaassammat.
Assartuineq pillugu Isumalioqatigiissitap isumaliutissiissutaani, Narsarsuarmi mittarfiup matuneqarnissaa innersuussutigineqarpoq, tamatumunngalu taarsiullugu Qaqortumi mittarfiliornissaq siunnersuutigineqarluni.
Mittarfiit marluk taama imminnut qanitsigisut ataatsikkut ingerlanneqarnissaat piviusorsiortuunngitsoq Kuupik Kleist isumaqarpoq. Taamaattumik tamanna pissutigalugu Issittumi sakkutooqarfissap Narsarsuarmiinnissaanik IA-p angallanneq pillugu suleqatigiissitaata innersuussutaa, ataatsimeersuarnermi aalajangiussanit peerneqarnissaa Kuupik Kleistip piumasarigaa, Sermitsiaq.ag-mi allaaserineqarpoq.
Nunatsinni angallannikkut aaqqissuussineq, Nunatsinni innuttaasut pisariaqartitaat aallaavigalugit tunngavilerneqarnissaa maanna piffissanngortoq Kuupik Kleistip ataatsimeersuarnermi erseqqissarpaa.Taamalu Amerikamiut sorsunnersuarmi kingullermi pisariaqartitatik tunngavigalugit Kangerlussuarmi Narsarsuarmilu mittarfeqarnerat tunngavineqarunnaartariaqartoq.
Maani politikerit isummernerat aallaaviginagu, Danmarkimi naalakkersuisut, Folketingimi illersornissaq pillugu isumaqatigiissutit tunngavigalugit, Issittumi Sakkutooqarfiup sumiinnissaa ukiaru aalajangiiffigisussaavaat. Suleqatigiissitap Illersornissamut ministeeriaqarfiup sulisitaata nalunaarusiaani erseqqissumik oqaatigineqarpoq, innersuussutigineqartuni pingasuusuni Nuuk akilersinnaanerpaasoq.