Kuupik: Paatsiveerunneq ullormit ullormut alliartorpoq

Aleqa Hammond Londonimi oqalugiarluni oqarpoq aatsitassarsiornermut periusissiaq  Inatsisartut upernaakkut ataatsimiinnerani taasissutigineqassasoq.

- Tamanna ilumuungilaq. Februaarip 15-iani tusagassiuutinut nalunaarummi Aatsitassanut Naalakkersuisoq Aleqa Hammonditut oqanngilaq. Taamanikkut Aatsitassanut Naalakkersuisoq nalunaarpoq uuliasiornermut aatsitassarsiornermullu periusissiap “inaarutaasumik ilusia” maanna naammassineqalersimasoq.

- Sorleq upperissavarput? Naalakkersuisut siulittaasuat imaluunniit aatsitassanut naalakkersuisoq?  Illuatunguliuttut siulittaasuat aperivoq.

Kuupik Kleistip oqarnera malillugu pineqartoq imaannaanngitsuvoq.

Periusissiaq inuit ikittut kimisiillutik matoqqalluinnartumik suliarivaat aamma  tusarniaanermut piffissaritinneqartoq sivikippoq tusarniaanermullu akissuteqaatit  amerlasuut ilanngussuunneqarsimarpasigatik, Kuupik V. Kleist oqarpoq.

Periussiap inaarutaasumik ilusia malitassatut allakkiatut suli inaarsarneqarsimanngitsutut isikkoqarpoq akissutaasinnaasunik innersuussinertaqaranilu piffissaliussartaqanngitsoq.

Tusarniaaneq februaarip 7-anni qaangiummat aqaguani 8. februaari periusissatut Naalakkersuisut aalajangiussimasartik saqqummiuppaat.
Illuatungiliuttut taamaasillutik kisimiilinngillat apeqqutissaqalersut assigiinngitsunik.

Soqutigisaqaqatigiiffiit uuliasiornermillu aatsitassarsiornermillu ingerlataqartut aamma taamaapput.

- Arlaleriarlugu uppernarsineqartarpoq nunap atugassarititaasussanut killissaliussai pillugit nalornisoornerit tassaasartut aningaasaliisussarsiornermut akorngutit annersarisartagaat, Kuupik V. Kleist oqarpoq.

Piffissanngorpoq Naalakkersuisut nalornisoortitsiunnaarlutik eqqortumik oqaluttalernissaat, Kuupik V. Kleist oqaaseqaateqarluni taama allappoq