Kuupik Ove Karlilu inatsisitigut pinngitsuutinneqarput
Politikerilli suliffeqarfinnik piginneqataaffeqarnerat pillugu paasissutisat taakkununnga tunngassuteqartut innuttaasunut ammasumik saqqummiunneqartarnissaat pillugu Kuupik Kleist ataatsimiititaliamik isumasioqatigineqarnissaa, Kukkunersiunermut Ataatsimiititaliap siulittaasuata oqaatigaa:
- Malittarisassat matumani malinneqarsimasut, misissuinerup takutippaa, suliamik ingerlatsinermi periaatsit tunngaviusut unioqqutinneqarsimanatik, Inatsisartut Kukkunersiuinermut Ataatsimiititaliap siulittaasua Naaja Nathanielsen oqarpoq.
Tassa imaappoq: Ove Karl Berthelsen aamma Kuupik Kleist Greengemsimut attuumassuteqannginnerat, Ataatsimiititaliap aalajangerpaa.
Eqqartuussisuserisunik misissuisitsisoqarnissaa, siorna oktobarimi oqallittoqareersorlu aalajangerneqarpoq, misissuinerullu tassa inerneraa naalakkersuisunut ilaasortat taakku marluk iliuuserisimasaat isornartoqanngitsut.
Naaja Nathanielsen nangilluni ima oqarpoq:
- Greengemsip akuersissummik qinnuteqarsimaneranut atatillugu Namminersorlutik Oqartussat suliamik ingerlatsinerat isornartoqanngitsoq nalilerparput, Kuupik Kleistillu Ove Karl Berthelsenillu Greengemsimut attuumassuteaarneranut atatillugu aamma isornartoqanngitsoq nalilerparput, Naaja Nathanielsen oqarpoq.
Inatsisilli malittarisassallu saniatigut ileqqorissaarnissamut tunngasut aamma oqallisigineqarput:
- Qinikkat soqutigisaat akuleriissinneqarnersut akuleriissinneqannginnersulluunniit pillugit suliat ajornakusoortuaannarput, inatsisitigut suut eqqoertuunersut ileqqorissaarnikkullu suut eqqortuunersut oqallisigineqarsinnaapput, uagullu nalilerparput isornartoqanngitsoq, Naaja Nathanielsen naggasiilluni oqarpoq.
