Kuupik: Oqalugiaatit pitsaanersarinngisaat

Naalakkersuisut siulittaasuat Kuupik taama isumaqarpoq.

Statsiminister Lars Løkke Rasmussenip folketingimi ammaanermi ullumi siusinnerusukkut oqalugiaammini Kalaallit Nunaat oqaatiginngilluinnangajappaa.

Taamaammat Naalakkersuisut siulittaasuata, Kuupik Kleistip, danskit naalakkersuisui saaffiginiarpai, paasiniarlugu danskit issittumi politikkeqarnissamik ilumut aallussinersut:

- Isumaqarpunga saneqqunneqarsinnaanngiluinnartoq, issittumi pissutsit pingaaruteqarluinnalernikuummata aamma nunarsuarmioqatigiit naalakkersuinikkut ingerlatsineranni, Kuupik Kleist oqarpoq.

Kuupik Kleistip eqqoriarusunngilaa ammaanermi oqalugiarnermi Nunarput sooq iluamik eqqaaneqannginnersoq. Kisianni nunanut allanut ministerip Lene Espersenip politikkikkut ajornartorsiornera tamatumunnga peqqutaasinnaasoq oqaatigalugu. Taamaakkaluartorli:

- Isumaqarpunga assut eqqarsarnartoqartoq, Danmarkimiit sianiginngitsuusarneqarluinnarnera. Kisianni soorunami nassuiaatissarisinnaasaa taasaavoq, Danmarkimi naalakkersuinikkut pissutsit naalakkersuisooqatigiit partiivinut najummatsersimanartorujussuummata, Kuupik Kleist oqarpoq.

Taamaammat isornartorsiuinera erseqqippoq.

- Naak naalagaaffiit issittumut attuumassuteqartut tamarmik issittumut tunngasumik annertuumik nalunaaruteqaqattaraluartut, Naalagaaffiup Danmarkip issittumut politikkeqartariaqarneranut tunngasumik oqaseqanngilluinnarmat, aammalu Danmarki issittumi siunnersuisoqatigiinni siulittaasuusutut tamakkununnga tunngasumik ataatsimilluunnnit oqaaseqanngimmat, amingaaterujussuartut kukkunertullu isigivara, Kuupik Kleist oqarpoq.

Tassalu oqalugiaatip kukkuneqarnera malunnaataasoq, Kuupik Kleist isumaqarpoq.

- Statsministerit ammaanerni oqalugiaatigisartagaanni tusarnaartakkanni pitsaanerpaajunngilluinnarpoq, Kuupik Kleist naggasiivoq.